Hoppa yfir valmynd

Frétt

14. maí 2021 Háskóla-٫ iðnaðar- og nýsköpunarráðuneytið

Matvælasjóður auglýsir úthlutun í annað sinn: 630 milljónir til úthlutunar

Kristján Þór Júlíusson, sjávarútvegs- og landbúnaðarráðherra, og Margrét Hólm Valsdóttir, formaður Matvælasjóðs, opnuðu í dag fyrir umsóknir í Matvælasjóð. Þetta er í annað sinn sem sjóðurinn auglýsir úthlutun. Matvælasjóður mun fá 250 milljón króna viðbótarframlag á þessu ári og er heildarúthlutunarfé sjóðsins alls 630 milljónir króna. Hlutverk sjóðsins að styrkja þróun og nýsköpun við framleiðslu og vinnslu íslenskra matvæla og hliðarafurða þeirra úr landbúnaðar- og sjávarafurðum á landsvísu.

Kristján Þór Júlíusson, sjávarútvegs- og landbúnaðarráðherra:

„Með stofnun Matvælasjóðs í fyrra vorum við í krafti nýsköpunar og þróunar að hvetja til aukinnar verðmætasköpunar í íslenskri matvælaframleiðslu. Það hefur sjaldan verið eins brýnt og nú enda lykilatriði í kjölfar COVID faraldursins að okkur takist að auka verðmætasköpun um allt land. Því er ég sannfærður um að sú úthlutun sem er fram undan geti orðið mikilvægur liður í þeirri efnahagslegu viðspyrnu sem fram undan er.”

Áhersla sjóðsins er á nýsköpun, sjálfbærni, verðmætasköpun og samkeppnishæfni íslenskrar matvælaframleiðslu og hliðarafurða um land allt. Markmið sjóðsins er að ná til verkefna á öllum stigum, allt frá hugmyndum til markaðssetningar og hagnýtra rannsókna. 

Sjóðurinn hefur fjóra flokka:

  • Bára styrkir verkefni á hugmyndastigi. Styrkur úr Báru fleytir hugmynd yfir í verkefni.
  • Kelda styrkir rannsóknaverkefni sem miða að því að skapa nýja þekkingu.
  • Afurðstyrkir verkefni sem komin eru af hugmyndastigi en eru þó ekki tilbúin til markaðssetningar, en leiða af sér afurð.
  • Fjársjóður styrkir sókn á markað. Fjársjóður er samansafn verðmætra hluta og styrkir fyrirtæki til að koma sínum verðmætum á framfæri.

Umsækjendur eru hvattir til að kynna sér heimasíðu sjóðsins, www.matvælasjóður.is en þar má finna handbók Matvælasjóðs, upplýsingar um umsóknir og allar nánari upplýsingar um sjóðinn. Í þessari annarri úthlutun hefur verið unnið að því að einfalda og skýra umsóknarferlið, handbók fyrir umsækjendur hefur verið uppfærð og skerpt á áherslum sjóðsins.

Margrét Hólm Valsdóttir, formaður stjórnar Matvælasjóðs.

„Ég tel að sjóðurinn skapi gríðarlega eftirsóknarverð tækifæri til að vinna að þróun og nýsköpun við framleiðslu og vinnslu matvæla og afurða tengdum þeim en jafnframt  opni á ný tækifæri á sviði rannsókna og í markaðssetningu. Gerðar hafa verið nokkrar breytingar á umsóknum og þá einna helst í flokknum Báru, þeim flokki sem flestar umsóknir bárust í við síðustu úthlutun en í þann flokk sækja aðilar sem eru enn með sínar hugmyndir á frumstigi en vilja fá stuðning til að greina og meta hvort sú hugmynd sem um ræðir sé fýsileg.
Umsóknarferlið hefur verið einfaldað og skýrt og vonandi sjáum við margar forvitnilegar hugmyndir koma inn í þennan flokk sem og hina þrjá, Keldu, Afurð og Fjársjóð.
Stjórn og starfsfólk sjóðsins hlakkar mikið til að takast á við vinnu við þær umsóknir sem eiga eftir að berast í sjóðinn enda greinilegt af þeim fjölda umsókna sem bárust í fyrstu úthlutun að mikið er í gangi í nýsköpun og þróun í íslenskri matvælavinnslu og mikil hugmyndaauðgi og vöruþróun í gangi í landinu.“

Umsóknarfrestur er til og með 6. júní 2021. 

Margrét Hólm Valsdóttir er  formaður stjórnar sjóðsins, en stjórn skipa með henni þau Heiðrún Lind Marteinsdóttir, Gunnar Þorgeirsson og Karl Frímannsson. 

Efnisorð

Heimsmarkmiðin

12. Ábyrð neysla og framleiðsla
8. Góð atvinna og hagvöxtur
9. Nýsköpun og uppbygging
15. Líf á landi
14. Líf í vatni
13. Aðgerðir í loftslagsmálum
17. Samvinna um markmiðin

Hafa samband

Ábending / fyrirspurn
Ruslvörn
Vinsamlegast svaraðu í tölustöfum