Sendiráð Íslands í Þýskalandi (þá Vestur-Þýskalandi) var stofnað í Hamborg árið 1952. Það fluttist til Bonn árið 1955 og svo til Berlínar árið 1999 í kjölfar sameiningar Austur- og Vestur-Þýskalands. Sendiráðið hefur jafnframt fyrirsvar gagnvart Tékklandi.

Starfsmenn eru átta talsins, þar af þrír útsendir: Sendiherra, staðgengill sendiherra og sendiráðsfulltrúi og fimm staðarráðnir starfsmenn: Viðskiptafulltrúi, menningarfulltrúi, tveir aðstoðarmenn sendiherra og bílstjóri.

Sendiráðið er staðsett á sendiráðssvæði Norðurlandanna við Tiergarten almenningsgarðinn í vesturhluta Berlínar. Norðurlöndin eiga með sér náið samstarf um fjölmörg mál á vettvangi og standa fyrir viðburðum í sameiginlegri menningarmiðstöð sendiráðanna Felleshus.

Meginhlutverk sendiráðsins er að gæta hagsmuna Íslands og Íslendinga í umdæmislöndum þess, sem og að efla og styrkja viðskiptaleg, menningarleg og pólítísk tengls. Sendiráðið veitir jafnframt borgaraþjónustu við Íslendinga í umdæmislöndunum.