Hoppa yfir valmynd
9. júní 2019 Heilbrigðisráðuneytið

Ný heilbrigðisstefna kynnt á opnum fundi á Akureyri 12. júní

Heilbrigðisstefna til ársins 2030 kynnt 12. júní í Hofi á Akureyri - myndHeilbrigðisráðuneytið

Efnt verður til opinna kynningarfunda um nýsamþykkta heilbrigðisstefnu til ársins 2030 í öllum heilbrigðisumdæmum landsins og verður fyrsti fundurinn haldinn í Hofi á Akureyri 12. júní næstkomandi. Fjallað verður um hvað felst í stefnunni, hvaða breytingar hún er líkleg til að hafa í för með sér og hvers vegna hún skiptir svo miklu máli, hvort heldur í þéttbýli eða í dreifðari byggðum landsins.

Heilbrigðisstefna – stefna fyrir íslenska heilbrigðisþjónustu til ársins 2030 var samþykkt á Alþingi 3. júní síðastliðinn. Kallað hefur verið eftir stefnu í heilbrigðismálum hér á landi um árabil og hafa nokkrar atrennur verið gerðar að slíkri stefnumótun frá því að heilbrigðisáætlun sem samþykkt var á Alþingi árið 2001 rann sitt skeið árið 2010. Samþykkt stefnunnar markar því tímamót.

Í  meginatriðum snýst heilbrigðisstefnan um um hvernig skapa megi heildstætt heilbrigðiskerfi fyrir alla landsmenn sem tryggir sjúklingum samfellda þjónustu á réttu þjónustustigi þar sem saman fara gæði, öryggi, skilvirkni og hagkvæmni. 

Fundurinn í Hofi 12. júní hefst kl. 17.00.

Dagskrá:

  • Kynning stefnunnar: Svandís Svavarsdóttir heilbrigðisráðherra
  • Sýn forstjóra: Jón Helgi Björnsson, forstjóri Heilbrigðisstofnunar Norðurlands
  • Sýn forstjóra: Bjarni Jónasson, forstjóri Sjúkrahússins á Akureyri

Að loknu erindi hvers frummælanda gefst fundargestum kostur á að beina til þeirra fyrirspurnum. Eftir stutt kaffihlé verða pallborðsumræður.

  • Pallborðsumræður: Þátttakendur í pallborði auk frummælenda verða María Heimisdóttir, forstjóri Sjúkratrygginga Íslands, Valdimar O. Hermannsson, bæjarstjóri á Blönduósi og Elsa B. Friðfinnsdóttir, skrifstofustjóri í heilbrigðisráðuneytinu.

Fundarstjóri verður Ásthildur Sturludóttir, bæjarstjóri á Akureyri.

Fundurinn er öllum opinn og aðgangur ókeypis.

Athygli er vakin á því að streymt verður beint frá fundinum og verður streymið aðgengilegt á vef sjónarpsstöðvarinnar N4, vef Stjórnarráðsins; www.stjornarradid.is og á vefsvæði heilbrigðisráðuneytisins; www.hrn.is.

Efnisorð

Hafa samband

Ábending / fyrirspurn
Ruslvörn


Þessi síða notar vafrakökur Lesa meira