Hoppa yfir valmynd
12. mars 2021 Atvinnuvega- og nýsköpunarráðuneytið

Klasastefna fyrir Ísland: Mikilvæg stoð fyrir samkeppnishæfni og verðmætasköpun

Klasasamstarf gengur út á að skapa tengslanet og samstarf fyrirtækja í viðskiptalífinu sem byggir á mannauði, tækni, fjármagni og þekkingu og ekki síst að skapa umhverfi til nýsköpunar og þróunar. Klasar eru hreyfiafl nýsköpunar í þeim geira sem hann myndast um. Ég er sannfærð um að í framtíðinni muni hlutverk klasa í nýsköpunarvistkerfi atvinnulífsins verða enn fyrirferðameira og mikilvægara. Þeir þurfa að fá það súrefni, eldmóð og kraft sem nauðsynlegur er til að knýja áfram verðmætasköpun og toga íslenskt atvinnulíf áfram upp stigann í átt að aukinni samkeppnishæfni,“ segir Þórdís Kolbrún Reykfjörð Gylfadóttir, ferðamála-, iðnaðar- og nýsköpunarráðherra, sem í dag kynnti með kynningarfundi nýja Klasastefnu fyrir Ísland. 

Hér má horfa á kynninguna: 

Hér má lesa nýja Klasastefnu fyrir Ísland. 

Hreyfiafl nýsköpunar 

Klasar eru efnahagsleg vistkerfi sem notuð eru til að bæta samkeppnishæfni og auka verðmætasköpun. Klasa er hægt að nota í þrennum tilgangi, til að leysa núverandi áskoranir, breyta og þróa núverandi ástand til betri vegar og til að  koma auga á og vinna að framgangi framtíðarvaxtargreina í atvinnulífinu. Klasastefna er því mikilvægt verkfæri til að forgangsraða verkefnum og fjármunum með markvissum hætti, efla samvinnu vísinda og atvinnulífs í þágu nýsköpunar og aukinnar samkeppnishæfni í samræmi við stefnu stjórnvalda og efla þannig hagsæld og lífsgæði. Hlutverk hennar er að benda á aðferðir og leggja til aðgerðir til að styðja við efnahagsvöxt með hámarkslífsgæði í huga. 

Stefnan er unnin í víðtæku samstarfi og samráði við grasrót atvinnulífsins sem og fjölda aðila innan stjórnkerfisins og hefur m.a. beina skírskotun til Nýsköpunarstefnu stjórnvalda til 2030  „Nýsköpunarlandið Ísland“, Vísinda- og tæknistefnu 2020–2022 og hefur margvíslegar tengingar við fleiri áherslur sem komið hafa fram á vegum stjórnvalda á síðustu árum. 

Markmiðið með klasastefnunni er að nýta hugmyndafræði sem gengur út á að hraða árangri við þróun og innleiðingu nýrrar tækni og nýskapandi lausna á fjölmörgum sviðum. Loftslagsmál, sjálfbærni, stafrænt samfélag,  heilbrigðis- og velferðarlausnir og alþjóðasókn eru þar í forgangi.   

Klasastefna fyrir Ísland tekur á flóknu samspili fjölmargra þátta sem liggja að baki þeim umskiptum sem nú standa yfir. Meðal þeirra áskorana sem hvað mestu máli skiptir að takast á við eru stafræn umbreyting, sjálfbær vöxtur og hringrásarhugsun, líftækni og heilsa og alþjóðasókn sem er forsenda árangurs á öllum sviðum nýsköpunar. 

Í stefnunni er sett fram sú framtíðarsýn að árið 2030 verði Ísland meðal fremstu þjóða heims hvað varðar sjálfbæra atvinnuuppbyggingu, samkeppnishæfni og almenna hagsæld, samkvæmt öllum helstu mælikvörðum.   

Ásta Kristín Sigurjónsdóttir, framkvæmdastjóri Íslenska ferðaklasans fjallaði um stefnuna, Þóranna K. Jónsdóttir, verkefnastjóri stafrænnar þróunar hjá Samtökum verslunar og þróunnar, Þór Sigfússon stórnarformaður og stofnandi Íslenska sjávarklasans og Sesselja Ingibjörg Barðdal Reynisdóttir, framkvæmdastjóri Eims, héldu örerindi og Héðinn Unnsteinsson, stefnumótunarsérfræðingur í forsætisráðuneytinu var með brýningu.  

Hér má lesa nýja Klasastefnu fyrir Ísland. 

Efnisorð

Heimsmarkmiðin

Hafa samband

Ábending / fyrirspurn
Ruslvörn
Vinsamlegast svaraðu í tölustöfum

Vefurinn notar vefkökur til að bæta upplifun notenda og greina umferð um vefinn. Lesa meira