Samið um þátttöku EFTA-ríkjanna í samstarfsáætlunum ESB
.jpg)
Samstarfsáætlununum er meðal annars ætlað að styrkja rannsóknir og nýsköpun, veita fólki á öllum aldri færi á að stunda nám í öðru Evrópulandi og ýta undir samskipti á milli fyrirtækja, stofnana og einstaklinga í Evrópu.
Ísland hefur ásamt EES/EFTA-ríkjunum, Liechtenstein og Noregi, tekið þátt í samstarfsáætlunum Evrópusambandsins allt frá upphafi EES-samstarfsins árið 1994 og er þátttakan í þessum hluta EES-samstarfsins endurnýjuð með reglubundnum hætti.
Íslenskir aðilar hafa átt góðu gengi að fagna í öllum áætlunum en aðgangur að öflugu samstarfi á sviðum mennta, menningar, vísinda og nýsköpunar skiptir miklu máli fyrir íslenskt samfélag og hefur ómæld jákvæð áhrif þegar til lengri tíma er litið. Reynslan sýnir aðávinningur af þátttöku í þeim er langtum meiri en sá kostnaður sem af því hlýst.
Rannís sinnir umsýslu með helstu áætlunum sem Ísland tekur þátt í, þær eru rannsóknar- og nýsköpunaráætlunin Horizon Europe, mennta- og æskulýðsáætlunin Erasmus+ og menningaráætlunin Creative Europe.
Nánar má fræðast um þátttöku Íslands í samstarfsáætlunum á vef EES-upplýsingaveitunnar.
Efnisorð
Heimsmarkmiðin
