Hoppa yfir valmynd
24. janúar 2023 Félags- og vinnumarkaðsráðuneytið

Stýrihópur vinnur að mótun heildstæðrar stefnu í málefnum innflytjenda og flóttafólks

Stýrihópur um mótun heildstæðrar stefnu í málefnum innflytjenda og flóttafólks hefur hafið störf. Áshildur Linnet, sérfræðingur í félags- og vinnumarkaðsráðuneytinu, er formaður hópsins og hittist hann í ráðuneytinu í gærmorgun.  

Stýrihópurinn er skipaður á grundvelli stjórnarsáttmála ríkisstjórnarinnar en þar er kveðið á um að mótuð verði skýr og heildstæð stefna í málefnum útlendinga á Íslandi. Skipunin byggir einnig á þingsályktun um framkvæmdaáætlun í málefnum innflytjenda fyrir árin 2022-2025. Stefnunni sem hópurinn mótar er ætlað að tryggja að fólk sem sest hér að hafi tækifæri til að aðlagast og taka virkan þátt í samfélaginu, þar með talið á vinnumarkaði. 

Við mótun stefnunnar verður meðal annars farið í saumana á því með hvaða hætti stuðla megi að inngildingu fólks í samfélagið, hvort sem um er að ræða innflytjendur eða flóttafólk hér á landi. Einnig er gert ráð fyrir að í stefnunni komi fram hvernig styðja megi við atvinnuþátttöku fólks.  

Sérstök áhersla verður lögð á að skoða möguleika fólks til virkrar þátttöku í samfélaginu og fjalla um félagsleg réttindi, menntun og atvinnuþátttöku með það að markmiði að á Íslandi verði fjölmenningarsamfélag þar sem grundvallarstefin eru jafnrétti, réttlæti og virðing fyrir manneskjum. 

 

Efnisorð

Hafa samband

Ábending / fyrirspurn
Ruslvörn
Vinsamlegast svaraðu í tölustöfum

Vefurinn notar vefkökur til að bæta upplifun notenda og greina umferð um vefinn. Lesa meira