Félags- og vinnumarkaðsráðherrar ESB og EFTA funduðu í Stokkhólmi

Áskoranir á vinnumarkaði og félagsleg vernd voru meðal fundarefna á óformlegum fundi félags- og vinnumarkaðsráðherra ESB sem haldinn var í Stokkhólmi fyrir skemmstu. Íslandi og öðrum EFTA-ríkjum var boðin þátttaka og sótti Guðmundur Ingi Guðbrandsson, félags- og vinnumarkaðsráðherra, fundinn fyrir Íslands hönd. Á dagskrá voru tvö meginfundarefni. 

Hæfni fólks og þarfir atvinnulífs

Fyrra fundarefnið laut að því hvernig unnt sé að mæta áskorunum vegna þess misvægis sem er á hæfni vinnuafls og þörfum atvinnulífs í Evrópu. Jafnframt hvaða hlutverki ríkisstjórnir, vinnustaðir, aðilar vinnumarkaðarins, aðrir haghafar og einstaklingar geta gegnt í þeim efnum. Sérstaklega var fjallað um það með hvaða hætti Evrópuáætlunin Year of Skills geti stuðlað að betra jafnvægi á þessu sviði.

Mikill samhljómur var í máli fundargesta um mikilvægi þess að fjárfesta í fólki til að bregðast við þeim áskorunum sem fram undan eru vegna skorts á sérhæfðu starfsfólki til að sinna störfum framtíðar, á sama tíma og atvinnuleysi er til staðar. Fundarmenn voru einnig sammála um að ekki væri nægilegt að bæta menntun á sviði stafrænnar tækni, heldur þyrfti endur- og símenntun að vera hluti af lífi og starfi okkar allra.

Ráðherrarnir skýrðu frá aðgerðum sem ráðist hefur verið í eða eru fyrirhugaðar til að bregðast við ofangreindum áskorunum. Guðmundur Ingi Guðbrandsson vakti athygli á því að mikilvægt væri að stefnumörkun og aðgerðir byggðu á gögnum um þær breytingar sem fram undan væru á vinnumarkaði.

Hann skýrði frá breytingum á fyrirkomulagi framhaldsfræðslu á Íslandi auk þess sem hann greindi frá aðgerðum í því skyni að auka samfélagslega virkni ungmenna sem eru hvorki í námi, vinnu né atvinnuleit.

Félagsleg vernd á tímum breytinga

Seinna viðfangsefni fundarins laut að því hvernig unnt sé að tryggja sjálfbæra félagslega vernd í ljósi grænna umskipta og lýðfræðilegra breytinga í Evrópu. Til grundvallar umræðum lá skýrsla sérfræðihóps þar sem meðal annars kemur fram að hærri lífaldur og lækkuð fæðingartíðni leiða til þess að þörf er á aukinni atvinnuþátttöku, auk þess sem endurskoða þarf félagsleg stuðningskerfi og fjármögnun þeirra.

Á fundinum kom fram að ríkin leita nú almennt leiða til að bregðast við þessum áskorunum með því að hvetja sem flest til atvinnuþátttöku og endurskipuleggja þjónustu við eldra fólk. Í framsögu Guðmundar Inga kom fram að mikilvægt sé að huga að fjárfestingu í velferð á öllum æviskeiðum.

Ráðherra skýrði meðal annars frá nýlegum breytingum á lögum í þágu barna á Íslandi og fyrirhuguðum breytingu á örorkulífeyriskerfinu sem miða að því að auka virkni og þátttöku í samfélaginu. Hann greindi einnig frá aðgerðaáætlun í málefnum eldra fólks, Gott að eldast, sem er ætlað að bæta heilsu og vellíðan eldra fólks auk þess að nýta hæfileika þess og reynslu til heilla fyrir samfélagið allt.