Matsferill – reglubundin vöktun námsframvindu
Með nýsamþykktum breytingum á grunnskólalögum verður Matsferill innleiddur sem nýtt námsmat í grunnskólum landsins á næsta skólaári. Innan Matsferils eru ný samræmd próf sem prufukeyrð voru á um 7.000 grunnskólanemum í 26 skólum víðs vegar um landið nú í vor.
Innleiðingin boðar breytta tíma þegar kemur að fyrirkomulagi námsmats í íslensku skólakerfi. Með tilkomu Matsferils verður í fyrsta sinn hægt að fylgjast skipulega með námi allra nemenda, ár frá ári, með stöðluðum prófum sem þó verður auðvelt að laga að skólastarfi og munu nemendur, forsjáraðilar og skólar þannig fá meiri og betri upplýsingar um stöðu og framfarir í námi en nokkru sinni fyrr.
Matsferill er safn fjölbreyttra matstækja sem draga upp heildstæða mynd af stöðu og framförum nemenda í námi, reglulega yfir skólagönguna. Matstækjunum er ætlað að auðvelda starfsfólki skóla að miða kennslu við þarfir hvers barns og tryggja að það fái viðeigandi kennslu og stuðning.
Jafnframt mun Matsferill veita skólastjórnendum og yfirvöldum dýrmæta innsýn sem nýtist til umbóta og stefnumótunar út frá áreiðanlegum rauntímagögnum. Það þýðir að hægt verður að bregðast mun hraðar og skilvirkar við aðstæðum sem upp kunna að koma, skólakerfinu og um leið öllum börnum til heilla.
Nýja námsmatið er ein af lykilaðgerðum í menntastefnu til ársins 2030 og 2. aðgerðaáætlun hennar sem birt verður í næstu viku.
„Það hefur vantað samræmt kerfi sem veitir yfirsýn yfir námsframvindu barna með reglulegum hætti yfir skólagöngu þeirra, með samanburðarhæfum niðurstöðum þar sem börn, foreldrar og kennarar geta brugðist við þá og þegar barn sýnir merki um að dragast aftur úr eða skara fram úr. Sömuleiðis fyrir skólastjórnendur og stjórnvöld til að fá upplýsingar um hvar skólarnir standa. Við þurfum tíðari og fjölbreyttari próf sem prófa fleiri þætti aðalnámskrár samhliða skyldubundnum nýjum samræmdum prófum – við þurfum Matsferil,“ segir Guðmundur Ingi Kristinsson, mennta- og barnamálaráðherra.
Fjórtán ný samræmd stöðu- og framvindupróf í lesskilningi og stærðfræði
Ný samræmd próf voru prufukeyrð í 26 skólum nú í vor og tóku um 7.000 börn þátt. Hér eftir verða þau lögð fyrir árlega í öllum bekkjum frá 4. bekk en frá 3. bekk þegar fram líða stundir. Um er að ræða 14 ný próf, 7 í lesskilningi og 7 í stærðfræði. Tilgangur þessarar fyrirlagnar var að leggja lokahönd á stöðlun og þróun prófanna, auk þess að prófa þau í framkvæmd. Fyrirlögnin gekk vel og undirbýr Miðstöð menntunar og skólaþjónustu nú að leggja prófin fyrir í öllum grunnskólum landsins næsta vor.
Skylt er að standa fyrir samræmdu námsmati í íslensku og stærðfræði fyrir alla nemendur í þeim árgöngum sem ráðherra kveður á um í reglugerð, þó að lágmarki einu sinni á hverju stigi grunnskóla, þ.e. einu sinni á yngsta stigi í 1.–4. bekk, einu sinni á miðstigi í 5.–7. bekk og einu sinni á unglingastigi í 8.–10. bekk. Jafnframt er heimilt samkvæmt ákvörðun ráðherra að standa fyrir skyldubundnu samræmdu námsmati fyrir nemendur í fleiri bekkjum og námsgreinum.