Forval vegna síðari áfanga gsm-þéttingar
Stjórn fjarskiptasjóðs hefur auglýst forval vegna síðari áfanga í þéttingu gsm-farsímanetsins á þjóðvegakerfinu. Senda skal inn þátttökutilkynningar fyrir kl. 11 fimmtudaginn 12. apríl.
Eitt verkefna fjarskiptasjóðs er að bæta farsímaþjónustu á vegakerfi landsmanna og var í janúar síðastliðnum samið við Símann hf. um verkefni á þessu sviði á Hringveginum og fimm fjallvegum. Gert er ráð fyrir að því verki ljúki í lok þessa árs.
Síðari áfangi gsm-verkefnisins sem nú er auglýstur snýst um að bæta þjónustuna á þjóðvegakerfinu sem fyrri áfanginn náði ekki til og á nokkrum ferðamannasvæðum. Einkum er horft til stofnvega og ferðamannasvæða í nágrenni þeirra. Einnig verður bætt þjónustua á nokkrum stöðum í þjóðgörðunum í Snæfellsjökli og Jökulsárgljúfrum.
Forvalsgögn verða til sölu hjá Ríkiskaupum frá hádegi næstkomandi miðvikudag og er verð þeirra 15 þúsund krónur.