Mál nr. 76/2023 Úrskurður 25. ágúst 2023
Mál nr. 76/2023 Eiginnafn: Fox (kk.)
Hinn 25. ágúst 2023 kveður mannanafnanefnd upp svohljóðandi úrskurð í máli 76/2023 en erindið barst nefndinni 1. ágúst.
Til þess að heimilt sé að samþykkja nýtt eiginnafn þurfa öll skilyrði 5. gr. laga, nr. 45/1996, um mannanöfn að vera uppfyllt. Skilyrðin eru:
- Eiginnafn skal geta tekið íslenska eignarfallsendingu eða hafa unnið sér hefð í íslensku máli.
- Nafnið má ekki brjóta í bág við íslenskt málkerfi.
- Það skal ritað í samræmi við almennar ritreglur íslensks máls nema hefð sé fyrir öðrum rithætti þess.
- Eiginnafn má ekki vera þannig að það geti orðið nafnbera til ama.
Reynir hér á hvort síðastnefnda skilyrðið um að eiginnafn megi ekki vera þannig að það geti orðið nafnbera til ama. Nafnorðið fox kemur fyrir í fornu lagamáli (Jónsbók) og merkir þar flærð eða pretti. Það er einnig notað í síðari alda máli yfir tófu, skapvarg, meinhorn. Mannanafnanefnd telur að nafnorðið hafi þannig neikvæða merkingu. Til hins er þó að líta að nafnið Fox hefur líklega ekki sömu þýðingu í huga almennings í dag og ólíklegt að ætla að það geti orðið nafnbera til ama.
Úrskurðarorð:
Beiðni um eiginnafnið Fox (kk.)er samþykkt og skal nafnið fært á mannanafnaskrá