Hoppa yfir valmynd
24. febrúar 2023 Utanríkisráðuneytið

Rússar verði dregnir til ábyrgðar

Þórdís Kolbrún Reykfjörð Gylfadóttir utanríkisráðherra ásamt Tiny Kox, forseta Evrópuráðsþingsins, Borys Tarasyuk,  fastafulltrúi Úkraínu hjá Evrópuráðinu og Marija Pejčinović Burić, framkvæmdastjóra Evrópuráðsins.  - mynd

Í dag, 24. febrúar, er ár liðið frá því að rússnesk stjórnvöld hófu innrásarstríð sitt í Úkraínu. Alþjóðasamfélagið hefur komið saman á þessum tímamótum til að sýna úkraínsku þjóðinni stuðning í baráttu sinni. 

Þórdís Kolbrún Reykfjörð Gylfadóttir utanríkisráðherra tók sem forseti ráðherranefndar Evrópuráðsins þátt í sérstakri dagskrá á vettvangi Evrópuráðsins í Strassborg, sem Ísland og Úkraína skipulögðu í sameiningu. Á opnum fundi ráðherranefndarinnar, sem utanríkisráðherra stýrði, samþykktu aðildarríkin að stíga fyrstu skref að stofnsetningu sérstakrar tjónaskrár vegna Úkraínu á vegum Evrópuráðsins. Tjónaskrá tæki til eignaskemmda, manntjóns og alvarlegra meiðsla sem innrás Rússlands í Úkraínu hefur leitt af sér og væri mikilvægur þáttur í því að tryggja að ábyrgðarskyldu fyrir Úkraínu yrði framfylgt. 

„Nú hefur ólögleg, tilefnislaus og grimmileg allsherjarinnrás Rússa í Úkraínu staðið yfir í heilt ár með tilheyrandi hörmungum. Árásir Rússa hafa beinst gegn almennum borgurum og nauðsynlegum innviðum og brýn þörf er til að skrá og skjalfesta það tjón sem hefur orðið á eignum og mannslífum. Þar getur Ísland og Evrópuráðið lagt sitt af mörkum. Við erum staðföst í því markmiði að niðurstaða leiðtogafundarins í Reykjavík skipti raunverulegu máli fyrir Úkraínu og ábyrgðarskyldu vegna þeirra brota sem Rússland hefur framið þar í landi,“ segir Þórdís Kolbrún. 

Auk fundarins í ráðherranefndinni, sem er sá fyrsti sem haldinn er fyrir opnum tjöldum, tók Þórdís Kolbrún þátt í ýmsum viðburðum þar sem afleiðingar innrásarinnar, ábyrgðarskylda Rússlands og leiðtogafundurinn í Reykjavík í maí bar hæst. Hún hélt meðal annars opnunarræðu á sérstökum viðburði til heiðurs Úkraínu við fánaborg höfuðstöðva Evrópuráðsins, opnaði ljósmyndasýningu tileinkaða Úkraínu í Strassborg og flutti vefávarp á sérstökum fundi Öryggis- og samvinnustofnunar Evrópu (ÖSE).

Í gær tilkynntu íslensk stjórnvöld jafnframt úkraínskum stjórnvöldum um þátttöku sína í kjarnahópi um stofnun sérstaks dómstóls um glæpi gegn friði í Úkraínu. Sjálfstæðar rannsóknanefndir sem settar hafa verið á laggirnar á vettvangi ÖSE og mannréttindaráðs Sameinuðu þjóðanna hafa komist að þeirri niðurstöðu að Rússar hafi framið stríðsglæpi og víðtæk mannréttindabrot. Ísland var meðal þeirra ríkja sem vísaði aðstæðum í Úkraínu til Alþjóðlega sakamáladómstólsins og er rannsókn hafin á stríðsglæpum, glæpum gegn mannúð og hópmorðum sem framin hafa verið í Úkraínu. Samhliða þessu er rannsókn og saksókn mála tengdum stríðinu í Úkraínu vel á veg komin fyrir úkraínskum dómstólum.

Martin Eyjólfsson ráðuneytisstjóri tók einnig þátt í umræðum í allsherjarþingi Sameinuðu þjóðanna í New York þar sem ályktun um réttlátan og viðvarandi frið í Úkraínu var samþykkt með yfirgnæfandi meirihluta.

Hér má lesa grein sem forsætisráðherra og utanríkisráðherra birtu í Morgunblaðinu í dag til að ítreka stuðning stjórnvalda við Úkraínu. Nánar má lesa um stuðning íslenskra stjórnvalda við Úkraínu hér.

 

Efnisorð

Heimsmarkmiðin

16. Friður og réttlæti

Hafa samband

Ábending / fyrirspurn
Ruslvörn
Vinsamlegast svaraðu í tölustöfum