Skýrsla starfshóps um skattlagningu orkuvinnslu
Hari Starfshópur sem fjármála- og efnahagsráðherra skipaði um skattlagningu orkuvinnslu hefur skilað skýrslu til ráðherra. Hópurinn, sem var skipaður á síðasta ári, fékk það verkefni að skoða skattalegt umhverfi orkuvinnslu í stærra samhengi.
Hópurinn skoðaði m.a. möguleika á nýrri skattalegri umgjörð og leiðir til að tryggja að ávinningur vegna nýtingar auðlinda skili sér í ríkari mæli til nærsamfélaga og þeirra aðila sem fyrir áhrifum verða.
Á kynningarfundi sl. fimmtudag kynnti Hilmar Gunnlaugsson, formaður starfshópsins, tillögur hópsins. Á fundinum lagði Þórdís Kolbrún Reykfjörð Gylfadóttir, fjármála- og efnahagsráðherra áherslu á tillögu starfshópsins sem miðar að því að afnema undanþágu frá fasteignamatsskyldu rafveitna.
Hópurinn lagði einnig til að skoða til framtíðar skattlagningu sem stuðli að því að umframávinningur vegna auðlindanýtingar skili sér til íslensks samfélags.
Starfshópurinn var þannig skipaður:
- Hilmar Gunnlaugsson, skipaður af fjármála- og efnahagsráðuneyti, formaður
- Kristín Haraldsdóttir skipuð af fjármála- og efnahagsráðuneyti
- Erla Sigríður Gestsdóttir, umhverfis-, orku- og loftslagsráðuneyti
- Daníel Svavarsson, forsætisráðuneyti
- Árni Sverrir Hafsteinsson, innviðaráðuneyti
Hópurinn kallaði á starfstíma sínum eftir sjónarmiðum í samráðsgátt stjórnvalda og naut ráðgjafar og vinnu sérfræðinga á ýmsum sviðum.
Kynning frá opnum fundi um helstu niðurstöður og tillögur.