Hoppa yfir valmynd

Prófnefnd verðbréfaviðskipta

ATH. Gert er ráð fyrir því að lagaumhverfi íslensks verðbréfamarkaðar muni breytast umtalsvert árið 2021 m.a. með nýjum lögum um markaði fyrir fjármálagerninga (MiFID2) og nýjum lögum um markaðssvik (MAR). Prófefnislýsing lögfræðihluta prófsins mun því breytast nokkuð á milli áranna 2021 og 2022. Í ljósi þess þá mælir prófnefnd verðbréfaviðskipta með því að próftakar sem hafa hug á því að taka prófið í lögfræðihlutanum um vorið 2021 taki það til skoðunar hvort það væri betra fyrir þá að taka prófið fremur um vorið 2022.

Prófnefnd verðbréfaviðskipta hefur umsjón með prófi í verðbréfaviðskiptum samkvæmt 53. gr. laga nr. 161/2002 um fjármálafyrirtæki.

Eftirtaldir aðilar skulu hafa staðist próf í verðbréfaviðskiptum:

  1. Starfsmenn verðbréfafyrirtækis sem hafa umsjón með daglegri starfsemi í tengslum við viðskipti og þjónustu með fjármálagerninga
  2. Einkaumboðsmenn sem starfa hér á landiskv. 3. málsl. 3. mgr. 20. gr. laga um verðbréfaviðskipti, nr. 108/2007.
  3. Framkvæmdastjóri rekstrarfélags og sjóðstjórar skv. 1. mgr. 14. gr. laga nr. 128/2011 um verðbréfasjóði
  4. Aðilar sem sinna eignastýringu verðbréfasafna lífeyrissjóðs skv. 4. mgr. 34. gr. laga nr. 129/1997 um skyldutryggingu lífeyrisréttinda og starfsemi lífeyrissjóða
  5. Sjóðstjórar fjárfestingarsjóða skv. 4. mgr. 80. gr. laga um rekstraraðila sérhæfðra sjóða, nr. 45/2020.

Próf í verðbréfaviðskiptum nýtast einnig öðrum þeim sem starfa á fjármálamarkaði og er öllum heimilt að skrá sig í prófið.

Ráðherra ákveður prófgjöld og skal greiða þau fyrir þau tímamörk sem prófnefnd ákveður. Um próf í verðbréfaviðskiptum gildir reglugerð nr. 1070/2020 um próf í verðbréfaviðskiptum.

Prófnefnd verðbréfaviðskipta
c/o Fjármála- og efnahagsráðuneyti
Arnarhvoli
150 Reykjavík
[email protected]


Efni til prófs, framkvæmd prófa o.fl.


Helstu verkefni prófnefndar verðbréfaviðskipta

  • Prófnefnd sér um að halda próf í verðbréfaviðskiptum a.m.k. einu sinni á ári.
  • Prófnefnd er heimilt að semja við utanaðkomandi aðila um framkvæmd prófa. Á hendi framkvæmdaraðila verðbréfaviðskiptaprófs er m.a. að annast skráningu í próf, innheimtu prófgjalda, útvegun húsnæðis vegna prófahalds, tilkynningar og upplýsingagjöf til próftaka vegna prófahalds, sending einkunna til próftaka og umsjón með prófsýningum í samráði við prófnefnd.
  • Prófnefnd er jafnframt heimilt að semja sérstaklega við óháða aðila um gerð og yfirferð prófa, en prófnefnd staðfestir að próftaki hafi staðist verðbréfaviðskiptapróf.
  • Prófnefnd tekur ákvörðun um efni sem prófað er úr og gefur út prófsefnislýsingu, sem birt er á vefsíðu prófnefndar.
  • Prófnefnd ákveður fjölda prófa og skulu þau að jafnaði vera skrifleg.

Verðbréfaviðskiptapróf

Próf í verðbréfaviðskiptum skiptist í tvo hluta:

  1. Lögfræði og
  2. Viðskiptafræði.

Próf eru haldin á tímabilinu mars til júní (þ.mt. upptöku-/veikindapróf). Ekki er skylt að standa fyrir prófi nema að lágmarki tíu þátttakendur hafi skráð sig í próf. Einkunnir á prófum eru gefnar í heilum og hálfum tölum frá 0-10. Próftaki telst ekki hafa staðist einstök próf hljóti hann lægri einkunn en 5,0.

Til þess að standast verðbréfaviðskiptapróf þarf próftaki að hljóta a.m.k. 7,0 í meðaleinkunn úr þeim prófum er hann hefur þreytt og skal próftaki hafa lokið öllum nauðsynlegum prófum með fullnægjandi árangri innan þriggja ára frá því að hann tók fyrsta prófið. Meðaleinkunn (lokaeinkunn) er gefin með tveimur aukastöfum.


Leyfileg hjálpargögn

Kveðið er á um leyfileg hjálpargögn í prófsefnislýsingu.


Prófsýningar

Próftaki á rétt á að sjá prófúrlausn sína ef hann æskir þess innan fimmtán daga frá birtingu einkunnar. Framkvæmdaraðili prófs í verðbréfaviðskiptum hverju sinni annast skráningu á prófsýningar og skipuleggur þær í samráði við prófnefnd verðbréfaviðskipta.

Próftaka er heimilt að skjóta mati á úrlausn til prófnefndar til endurmats innan tveggja mánaða frá birtingu einkunnar. Prófnefnd getur skipað prófdómara til að endurskoða úrlausn próftaka á ábyrgð nefndarinnar. 


Undanþágur frá töku prófa

Hér er umfjöllun um undarþágur frá töku prófa skv. 5. gr. reglugerðar nr. 1070/2020 um próf í verðbréfaviðskiptum.

Þeir sem lokið hafa prófi, eða öðlast réttindi á Evrópska efnahagssvæðinu sem krafist er í við­komandi ríki til að vera heimilt að hafa umsjón með daglegri starfsemi í tengslum við viðskipti með fjármálagerninga, eiga rétt á að fá útgefið skírteini um próf í verðbréfaviðskiptum, sbr. tilskipun Evrópu­þingsins og ráðsins 2005/36/EB um viðurkenningu á faglegri menntun og 2. gr. laga nr. 26/2010 um viðurkenningu á faglegri menntun og hæfi til starfa hér á landi. Beiðnum um skírteini skv. 1. málsl. skal beint til prófnefndar.

Sýna þarf fram á að próftaki uppfylli skilyrði til undanþágu frá próftöku á þessum grundvelli.

Erindi vegna undanþágu frá töku prófa á þessum grundvelli skal beint til prófnefndar verðbréfaviðskipta á netfangið [email protected] ásamt nauðsynlegum fylgigögnum og staðfestingum.


Námskeiðahald

Öllum er heimilt að skrá sig til verðbréfaviðskiptaprófs. Ekki er gerð krafa um að próftakar sitji námskeið til undirbúnings prófi í verðbréfaviðskiptum, en háskólastofnanir bjóða reglulega upp á slík námskeið.

Opni háskólinn í Háskólanum í Reykjavík býður upp á námskeið til undirbúnings prófi í verðbréfaviðskiptum og annast jafnframt framkvæmd verðbréfaviðskiptaprófs.

Upplýsingar og skráning í próf fara fram á vef Opna háskólans.

Var efnið hjálplegt?Nei
Takk fyrir

Ábendingin verður notuð til að bæta gæði þjónustu og upplýsinga á vef Stjórnarráðsins. Hikaðu ekki við að hafa samband ef þig vantar aðstoð.

Af hverju ekki?

Yfirlit

Hafa samband

Ábending / fyrirspurn
Ruslvörn
Vinsamlegast svaraðu í tölustöfum

Vefurinn notar vefkökur til að bæta upplifun notenda og greina umferð um vefinn. Lesa meira