Hoppa yfir valmynd

Þjóðskrá og fasteignaskrá

Þjóðskrá og fasteignaskrá teljast í flokki mikilvægustu grunnskráa ríkisins. Fleiri skrár tengjast þeim beint eða óbeint, svo sem lögheimilisskrá, íbúaskrá, kjörskrá, skipaskrá, loftfaraskrá, bifreiðaskrá, húsaskrá o.fl.

Þjóðskrá Íslands annast skráningu einstaklinga og sér um daglegan rekstur og vinnslu þjóðskrár. Stofnunin sér einnig um fasteignaskrá og ákvarðar fasteignamat. Um Þjóðskrá Íslands gilda lög nr. 70/2018.

Þjóðskrá

Allir íbúar landsins eru skráðir í þjóðskrá. Þar er skráð fullt nafn, kennitala, heimilisfang o.fl. Þjóðskráin liggur til grundvallar ákvörðunum um réttindi og skyldur einstaklinga með lögheimili á Íslandi og íslenskra ríkisborgara t.d. ákvörðun um skattskyldu, kosningarrétt, rétt á íslensku vegabréfi, sem Þjóðskrá Íslands gefur út, aðgang að ýmsum réttindum sem grundvallast t.d. á lögheimili eða hjúskaparstöðu. Mikilvægt er að skráning í þjóðskrá sé rétt, sjá Mínar síður á Ísland.is.

Um þjóðskrá gilda lög um þjóðskrá og almannaskráningu nr. 54/1962 en lögin sæta nú endurskoðun. Ein af skrám þjóðskrár er  lögheimilisskrá en í henni er að finna upplýsingar um lögheimili landsmanna. Um lögheimili og aðsetur gilda lög nr. 80/2018 sem tóku gildi 1. janúar 2019 og reglugerð nr. 1277/2018. Sjá nánar í frétt um gildistöku og helstu nýjungar laganna

Fasteignaskrá

Grunnskrá ríkisins yfir fasteignir sem til eru í landinu nefnist fasteignaskrá og annast Þjóðskrá Íslands skrána. Í fasteignaskrá eru skráðar allar fasteignir í landinu; grunnupplýsingar um lönd, lóðir og spildur auk mannvirkja sem á þeim standa.

Í henni er einnig að finna upplýsingar um stærðir landeigna og mannvirkja, upplýsingar um byggingarefni og lýsingu á viðkomandi mannvirki, auk fasteigna- og brunabótamats. Fasteignaskrá geymir til viðbótar upplýsingar um þinglýst réttindi, svo sem um eigendur, veðbönd og kvaðir. Saga breytinga á skráningu fasteignar skal varðveitt í fasteignaskrá.

Um skráningu og mat fasteigna gilda lög nr. 6/2001.

Yfirfasteignamatsnefnd

Yfirfasteignamatsnefnd annast yfirmat fasteigna fyrir landið allt. Fasteignamat endurspeglar gangverð fasteignar. Hagsmunaaðilar geta óskað eftir endurmati fasteigna og kært niðurstöðu þess til yfirfasteignamatsnefndar. Kæra skal vera skrifleg og studd rökum og nauðsynlegum gögnum. Um meðferð máls fyrir nefndinni, framlagningu gagna eða málflutning fer eftir ákvörðun nefndarinnar. Nefndin skal úrskurða slíkt mál innan þriggja mánaða frá kæru nema sérstök heimild fyrir frestun sé veitt af hálfu ráðuneytisins. Niðurstaða kærumáls skal þegar tilkynnt aðila þess og nýtt matsverð þegar skráð í fasteignaskrá. Úrskurður yfirfasteignamatsnefndar er fullnaðarúrskurður.

Sjá einnig:

Var efnið hjálplegt?Nei
Takk fyrir

Ábendingin verður notuð til að bæta gæði þjónustu og upplýsinga á vef Stjórnarráðsins. Hikaðu ekki við að hafa samband ef þig vantar aðstoð.

Af hverju ekki?

Hafa samband

Ábending / fyrirspurn
Ruslvörn


Þessi síða notar vafrakökur Lesa meira