Hoppa yfir valmynd

Haus fyrir smærri skjái

Merki Stjórnarráðs Íslands Stjórnarráð Íslands
17. október 2022 Utanríkisráðuneytið

Föstudagspósturinn á mánudegi, 17. október 2022

Heil og sæl.

Það hefur sannarlega verið nóg um að vera í utanríkisráðuneytinu á síðustu dögum vegna Hringborðs norðurslóða - Arctic Circle. Í tengslum við ráðstefnuna sem stóð yfir í Reykjavík frá fimmtudegi til laugardags hefur utanríkisráðherra átt fjölmarga fundi með erlendum gestum og tekið þátt í fjölbreyttri dagskrá.

Á föstudag undirrituðu Þórdís Kolbrún Reykfjörð Gylfadóttir utanríkisráðherra og Jenis av Rana, utanríkis- og menningarmálaráðherra Færeyja, rammasamning um fiskveiðar milli Íslands og Færeyja. 

„Samskipti Íslands við Færeyjar og Grænland er bæði mikil og traust og í þeim felast fjölmörg tækifæri til að þróa enn frekar eins og fram kemur í nýlegum skýrslum þar sem nýir samstarfsfletir eru kortlagðir. Það er mín ósk að frekari innleiðing markmiða um aukna samvinnu þjóðanna muni ganga hratt og örugglega fyrir sig. Samband okkar við þessa næstu nágranna er okkur afar mikilvægt,“ sagði Þórdís Kolbrún Reykfjörð Gylfadóttur utanríkisráðherra.

Þá var tvíhliða samstarf Íslands og Noregs á vettvangi norðurslóðafræða endurnýjað til næstu fjögurra ára við hátíðlega athöfn í Hörpu að viðstöddum Hákoni krónprinsi Noregs og Þórdísi Kolbrúnu.

Í ítarlegri fréttatilkynningu frá ráðuneytinu í dag má svo lesa um ítarlega þátttöku ráðherra á ráðstefnunni, en þar segir meðal annars frá fundi ráðherra með Rob Bauer, formanni hermálanefndar Atlantshafsbandalagsins. 

Til viðbótar við Arctic Circle var ýmislegt annað á döfinni hjá utanríkisráðuneytinu.

Neyðarfundi í allsherjarþingi Sameinuðu þjóðanna um stöðu mála í Úkraínu lauk í síðustu viku með atkvæðagreiðslu um ályktun sem um 80 ríki, þar með talið Ísland, voru meðflytjendur að. Ályktunin var samþykkt með miklum meirihluta, en 143 ríki kusu með ályktuninni sem er meiri stuðningur en í fyrri ályktunum um innrás Rússlands í Úkraínu. Fimm ríki, þ.m.t. Rússland og Belarús, kusu gegn ályktuninni og 35 ríki sátu hjá. NB8 ríkin sameinuðust um ræðu á fundinum.


Þá flutti Þórdís Kolbrún ávarp og tók þátt í pallborðsumræðum á árlegri friðarráðstefnu Höfða friðarseturs sem haldin var í samstarfi við utanríkisráðuneytið og Nordic Women Mediators í Veröld - húsi Vigdísar.

Á miðvikudag undirrituðu Þórdís Kolbrún og Kerin Ann Burns Ayyalaraju sendiherra Ástralíu gagnvart Íslandi, tvísköttunarsamning milli Íslands og Ástralíu.

Ísland og Suður-Kórea áttu svo sextíu ára stjórnmálasambandsafmæli á dögunum og sótti ráðherra menningardagskrá í Hörpu sem sendiráð Suður-Kóreu í Osló stóð fyrir ásamt samstarfsaðilum á Íslandi.

Á dögunum var svo ljósmyndasýning Mannfjöldasjóðs Sameinuðu þjóðanna (UNFPA) um barnungar mæður í þróunarríkjum opnuð í Smáralind. Utanríkisráðherra opnaði sýninguna og flutti ávarp.

En þá að sendiskrifstofum okkar.

Í Brussel tók Hermann Ingólfsson, sendiherra og fastafulltrúi Íslands hjá Atlantshafsbandalaginu, þátt í varnarmálaráðherrafundi Atlantshafsbandalagsins á dögunum. Grimmilegur stríðsrekstur Rússlands gegn Úkraínu, og viðbúnaður og fælingarstefna bandalagsins voru í forgrunni.

Í Genf afhenti Einar Gunnarsson sendiherra Íslands gagnvart Sviss og fastafulltrúi gagnvart alþjóðastofnunum þar í borg, Ignazio Cassis, forseta Sviss, trúnaðarbréf sitt.

Á dögunum kynnti píanistinn Víkingur Heiðar Ólafsson nýja plötu sína í sendiherrabústaðnum í Berlín. Í samstarfi við Deutsche Grammophon og með stuðningi frá Skapandi Íslandi/Íslandsstofu og ÚTÓN stóð sendiráðið fyrir 60 manna móttöku. Á föstudaginn var svo opnuð myndlistarsýning Guðnýjar Guðmundsdóttur og Mette Thiessen í sendiherrabústaðnum. Það hefur svo sem verið nóg um að vera í Berlín hjá okkar fólki en sjá má allt það helsta á Facebook-síðu sendiráðsins.

Harald Aspelund sendiherra í Helsinki var mættur á Arctic Circle eins og svo margir aðrir í síðustu viku.

Fjölmargir úr sendiráði okkar í Kanada sóttu Hringborð norðurslóða í ár og það sama á við um Kanada sem sendi yfir 150 þátttakendur á ráðstefnuna í ár.

Sendiherrahjónin Helga Hauksdóttir og Hafþór Þorleifsson, ásamt fulltrúa ræðismála Kristínu Kristjánsdóttur sóttu kjörræðismann Íslands í Esbjerg, Peter Kirk Larsen og Kirsten Hansen, heim í síðustu viku.

Sendiherrar Norðurlanda í Osló áttu í dag hádegisverðarfund með forsætisráðherra Noregs í boði sendiherra Finnlands. Rætt var m.a. um norrænt samstarf í utanríkis- og varnarmálum og grænum orkumálum.

Í tilefni Alþjóðlegs dags stúlkunnar tók íslenska sendiráðið í London, ásamt fjölda sendiráða í Bretlandi, þátt í verkefninu Ambassador for a Day. Ema Begum var „sendiherra Íslands“ í einn dag og fékk innsýn í störf sendiráðsins.

Nýr þáttur í hlaðvarpinu Icelandic Voices/American Accent, á vegum aðalræðisskrifstofu okkar í New York kom út á fimmtudag. Í þetta sinn var rætt við Írisi Óskarsdóttir-Vail, listakonu og verðlaunabakara.

Bergdís Ellertsdóttir sendiherra Íslands í Washington hitti sendiherra Bandaríkjanna á Íslandi, Carrin F. Patman.

Þá tók hún einnig þátt í pallborðsumræðum um samskipti við Alaska.

Okkar fólk í sendiráði Íslands í Washington stóð annars í ströngu á Arctic Circle enda sótti 200 manna hópur frá Bandaríkjunum ráðstefnuna í ár. Derek Chollet, háttsettur embættismaður í bandaríska utanríkisráðuneytinu, kynnti meðal annars nýja stefnu Bandaríkjanna í norðurslóðamálum, og fundaði með utanríkisráðherra Íslands.

Jörundur Valtýsson sendiherra og fastafulltrúi Íslands gagnvart Sameinuðu þjóðunum, tók á móti íslenskri þingnefnd.

Á Indlandi hittu Guðni Bragason sendiherra og Benedikt Höskuldsson, sérstakur fulltrúi fyrir loftslagsmál, R. K. Mathur, fylkisstjóra Ladakh-fylkis, þar sem rætt var um samstarf Íslendinga um nýtingu jarðvarma í Ladakh-fylki.

Þórir Ibsen sendiherra í Kína er staddur í Taílandi og hitti þar m.a. ræðismann Íslands í Phuket, Nim Kallayawarat.

Í Malaví var haldið upp á mæðradaginn. Mæðravernd og fæðingarþjónusta er fyrirferðamikil í tvíhliða þróunarsamvinnu Íslands í Malaví.

Inga Dóra Pétursdóttir forstöðumaður sendiráðs Íslands í Lilongwe, ræddi um starf Íslands í tvíhliða þróunarsamvinnu í Mangochi-héraði.

Við minnum að endingu á Heimsljós.

Fleira var það ekki í bili.

Bestu kveðjur frá upplýsingadeild.

Efnisorð

Föstudagspóstur

Hafa samband

Ábending / fyrirspurn
Ruslvörn
Vinsamlegast svaraðu í tölustöfum