Viðskipti
Viðskiptaþjónustan sinnir þjónustu við íslensk fyrirtæki og styrkir samkeppnisstöðu á alþjóðlegum mörkuðum, sinnir kynningu á Íslandi sem áfangastað ferðamanna og stýrir samstarfi utanríkisþjónustunnar við íslenska aðila á sviði menningar, landkynninga og viðskipta. Starfseminni er að mestu sinnt erlendis en allar sendiskrifstofur Íslands sinna viðskiptaþjónustu, ferðamálum og menningarkynningu. Sérstakir viðskipta- og ferðamálafulltrúar eru við störf í stærri sendiráðum Íslands sem liðsinna íslenskum fyrirtækjum erlendis og koma íslenskum viðskiptahagsmunum á framfæri með fjölbreyttum hætti í hverju umdæmi fyrir sig.
Umsjón með viðskiptamálum hefur Stefanía Kristín Bjarnadóttir, [email protected]
Öflug viðskipti við útlönd og kraftmikið efnahagslíf er undirstaða velferðar á Íslandi. Á viðskiptasviði utanríkisráðuneytisins er unnið að því að gæta hagsmuna íslenskra ríkisborgara, íslenskra fyrirtækja og neytenda með því að tryggja þeim aðgang að alþjóðamörkuðum og efla fríverslun.
Sendiráð Íslands í Kaupmannahöfn sinnir viðskiptaþjónustu, ferðamálum og menningarkynningu, en m.a. veitir sendiráðið íslenskum fyrirtækjum í Danmörku og í öðrum umdæmislöndum sendiráðsins aðstoð í samstarfi með Íslandsstofu, Viðskiptaráði og öðrum hlutaðeigandi stofnunum og hagsmunasamtökum í því augnamiði að stilla saman strengi allra þeirra sem starfa að viðskiptum, ferðamálum og menningarkynningu á erlendri grund.
Er þitt fyrirtæki að íhuga danska markaðinn fyrir ykkar vöru eða þjónustu? Hafið samband við Sigríði Dögg Guðmundsdóttur forstöðumann útflutnings hjá Íslandsstofu ([email protected]) eða umsjónarmann viðskiptamála Stefaníu Kristínu Bjarnadóttur í sendiráði Íslands í Kaupmannahöfn [email protected].
Leiðbeiningar vegna afnota af fundarherbergi sendiráðs Íslands í Kaupmannahöfn
- Íslenskum fyrirtækjum, vegna markaðsetningar í Danmörku á íslenskum vörum og þjónustu, og íslenskum ríkisstarfsmönnum í opinberum erindagjörðum standa til boða ókeypis afnot á fundarherbergi sendiráðs Íslands í Kaupmannahöfn.
- Panta þarf fundarherbergið með eins mánaðar fyrirvara (að jafnaði).
- Afnot fundarherbergisins eru einungis heimil virka daga. Fundir geta hafist kl. 09:30, en fundargestir verða að yfirgefa sendiráðið í síðasta lagi kl. 15:30.
- Fundarherbergið rúmar að hámarki 14 manns í sæti og skal fjöldi fundargesta taka sem mest mið af því.
- Sendiráðið veitir afnot af skjávarpa en notendur fundarherbergis sjá sjálfir um að leggja til fartölvur og annan viðeigandi búnað. Mælt er með að hafa kynningar til öryggis einnig á minnislyklum.
- Tilkynna verður sendiráðinu um væntanlegan fjölda fundargesta.
- Ætlast er til að gengið sé hljóðlega og snyrtilega um vinnurýmið.
- Sendiráðið getur endurgjaldslaust boðið upp á drykkjarföng, þ.e. kaffi og vatn.
Viðskiptaáætlun sendiráðs Íslands í Kaupmannahöfn
Á grundvelli nýrrar framtíðarstefnu stjórnvalda og atvinnulífs fyrir íslenskan útflutning, sem Íslandsstofa kynnti síðastliðið haust, hefur sendiráðið í Kaupmannahöfn unnið greiningu á danska markaðnum, þróun viðskipta á milli landanna og tækifærum fyrir íslenskt atvinnulíf. Áhersla var lögð á að skilgreina hvernig sendiráðið getur lagt sitt af mörkum við framkvæmd nýju stefnunnar, kortleggja þau verkefni sem fram undan eru og tryggja samhljóm við starf Íslandsstofu.
Kortlagning á danska nýsköpunarumhverfinu
Kaupmannahöfn er orðin mikilvæg miðstöð nýsköpunar og frumkvöðlastarfs og getur aðgangur að öflugu tengslaneti í Danmörku skipt sköpum fyrir íslensk frumkvöðlafyrirtæki.
Í kjölfarið af útgáfu Viðskiptaáætlunar sendiráðs Íslands í Kaupmannahöfn í maí sl. hóf sendiráðið að kortleggja þennan geira í Danmörku og taka saman nytsamlegar upplýsingar fyrir frumkvöðla. Hér má m.a. finna yfirlit yfir frumkvöðlasetur, viðskiptahraðla, og mikilvæga tengiliði, m.a. fjárfesta í hinum ýmsu geirum, viðskiptaengla og fleiri sem geta aðstoðað íslensk sprotafyrirtæki eða veitt þeim ráðgjöf.
Samantekt viðskipta
Í samantektinni er fyrst og fremst leitast við að taka saman tölur yfir vöru- og þjónustuútflutning Íslands til Norðurlandanna á árunum 2013-2020, auk lítilsháttar greiningar og samanburðar í þróun á milli tímabila annars vegar og landa hins vegar, sem og samanburðar við verðmæti innflutnings frá sömu löndum.
Tölur yfir fjölda ferðamanna til Íslands frá Norðurlöndunum á tímabilinu 2010-2020, sem fengnar eru frá Ferðamálastofu, eru settar fram í stuttu máli.