Móttaka flóttafólks

Íslensk stjórnvöld hafa gripið til umfangsmikilla aðgerða til að taka á móti flóttafólki

• Aldrei hafa fleiri komið til landsins á flótta en nú. 
• Það sem af er ári hafa ríflega tvisvar sinnum fleiri sótt um alþjóðlega vernd á Íslandi en allt árið 2021.
• Margir umsækjendur um alþjóðlega vernd koma frá Úkraínu vegna innrásar Rússlands en hingað leitar einnig fólk víða annars staðar frá í leit að vernd. Íslensk stjórnvöld hafa sömuleiðis boðið hópum í viðkvæmri stöðu til landsins.
• Tæplega 2.000 umsækjendur um alþjóðlega vernd dvelja nú í búsetuúrræðum á vegum Vinnumálastofnunar en stofnunin þjónustar umsækjendur um alþjóðlega vernd hér á landi.
• Hér fyrir neðan er að finna umfjöllun um réttindi flóttafólks og hlutverk hinna ýmsu stofnana við móttöku fólksins, auk undirsíðna með margvíslegri tölfræði.

Samningar um samræmda móttöku flóttafólks

• Sveitarfélög vítt og breitt um landið hafa undirritað samninga um svokallaða samræmda móttöku flóttafólks. Samningarnir eru gerðir við félags- og vinnumarkaðsráðuneytið, ásamt fjármála- og efnahagsráðuneytinu og Vinnumálastofnun. Sveitarfélög ákveða sjálf hversu mörgum flóttamönnum þau taka á móti samkvæmt samningnum.
• Samræmd móttaka flóttafólks er hugsuð fyrir þau sem fengið hafa alþjóðlega vernd á Íslandi og þurfa stuðning við að ná rótfestu hér á landi (sjá einnig spurningu um samræmda móttöku hér neðar á síðunni)
• Samningur um samræmda móttöku flóttafólks samanstendur af samningnum sjálfum og tveimur fylgiskjölum: Kröfulýsingu og kostnaðarlíkani. Öll skjölin er að finna hér á vefnum:
  
  
  • Samningur um samræmda móttöku flóttafólks.
  • Kröfulýsing, dags. 19. nóvember 2022.
  • Kostnaðarlíkan, dags. 12. febrúar 2023.

Alþjóðleg vernd og mannúðarsjónarmið

Þau sem sæta ofsóknum í heimalandi sínu eða eiga þar á hættu til að mynda dauðarefsingu, pyndingar eða ómannúðlega meðferð eiga rétt á alþjóðlegri vernd sem flóttamenn.

Þau sem koma hingað til lands og óska eftir viðurkenningu á stöðu sinni sem flóttamenn teljast vera umsækjendur um alþjóðlega vernd. Áður var talað um hælisleitendur – fólk í leit að hæli, það er griðastað.

Flóttafólkið sem leitað hefur skjóls á Íslandi frá Úkraínu eftir innrás Rússlands hefur fengið dvalarleyfi á grundvelli mannúðarsjónarmiða, sjá spurt og svarað hér að neðan.

Spurt og svarað um einingahús fyrir umsækjendur um alþjóðlega vernd