Könnun á þjónustu ríkisstofnana

Hvers vegna að kanna þjónustu? 

Mikilvægt er að opinber þjónusta sé skipulögð í takti við væntingar og þarfir samfélagsins, hverju sinni. Tilgangur þjónustukönnunar ríkisstofnana er að meta ánægju með opinbera þjónustu og auðvelda stofnunum að skipuleggja þjónustuna þannig að hún reynist sem best. Könnunin felst í því að almenningur er beðinn um að meta þjónustu ákveðinna ríkisstofnana og er heildar ánægja reiknuð sem meðaltal svara allra stofnana. Eðlilegt er að munur sé á ánægju á milli einstaka stofnana þar sem fyrirkomulag þjónustunnar er ólíkt og hefur þar af leiðandi ólíka snertingu við þjónustuþega.

Spurt er um heildaránægju, viðmót, hraða og áreiðanleika. Þá er spurt um með hvaða hætti viðkomandi hefur nálgast þjónustuna og með hvaða hætti viðkomandi myndi helst kjósa að nálgast þjónustuna.

Ef skýrslan birtist ekki hér að neðan er einnig hægt að fara beint inn á „Þjónustukönnun ríkisstofnana“ til að sjá niðurstöður.

Nánar um framkvæmdina 

Framkvæmdin 2024 fer í gegnum Prósent rannsóknir og verður framkvæmd á 12 mánaða tímabili frá maí 2024-maí 2025. Notendur verða spurðir í rauntíma um ánægju með þjónustu og með netpanel. Í fyrsta skipti verður könnunin einnig á ensku, pólsku og íslensku táknmáli og er vonin að ná til sem flestra í samfélaginu. Stefnt er á að fá niðurstöður fyrir flest allar stofnanir ríkisins.

Framkvæmdin 2023 fór fram í gegnum Maskínu í mars, apríl og maí 2023. Könnunin var send í gegnum þjóðarpanel Maskínu ásamt því að netfangakönnun var send út fyrir hluta stofnana sem erfitt er að mæla í gegnum þjóðarpanel. Fjöldi þátttakaenda var 4904 einstaklingar af öllu landinu 18 ára og eldri. Alls var spurt um 134 stofnanir. Ekki er lengur spurt um ánægju með stafræna þjónustu sérstaklega þar sem mikið af þjónustu er nú þegar veitt stafrænt og ekki talið nauðsynlegt að skilja þar á milli.

Framkvæmd 2022 fór fram í gegnum spurningavagn Gallups á tímabilinu 7. janúar til 29. mars 2022. Fjöldi þátttakenda var 10.977 einstaklingar af öllu landinu, 18 ára og eldri, sem svara könnunum á netinu. Alls var spurt um 45 stofnanir. Könnun meðal stjórnenda var lögð fyrir á netinu vegna 8 stofnana og í úrtaki voru 408 stjórnendur hjá ríkinu.

Framkvæmd 2020 fór fram í gegnum spurningavagn Gallups á tímabilinu 20 desember 2019-14. febrúar 2021. Fjöldi þátttakenda var 5.808 manns. Alls var spurt um 33 stofnanir. Könnun meðal stjórnenda hjá ríkinu var lögð fyrir á netinu og í úrtaki voru 172 stjórnendur hjá ríkinu. Könnun meðal fyrirtækja var lögð fyrir á netinu og í úrtaki voru 1.066 aðildarfyrirtæki að Samtökum atvinnulífsins.