Opinber þjónusta er byggð upp með lýðræði, skilvirkni og þarfir almennings og atvinnulífs að leiðarljósi. Góð þekking á upplýsingatækni og aðgangur að opinberum gögnum stuðlar að nýsköpun og vexti atvinnulífsins. Stefnt er að því að almenningur og atvinnulíf geti í vaxandi mæli haft áhrif á ákvarðanir opinberra aðila með því að taka þátt í undirbúningi þeirra í opnu og gegnsæju samráði á netinu.
Unnið er samkvæmt stefnu ríkis og sveitarfélaga um upplýsingasamfélagið, Vöxtur í krafti netsins - byggjum, tengjum og tökum þátt. Í henni er horft til tækifæra sem fylgja ýmsum tækninýjungum svo sem notkunar netsins til að auka lýðræðislega þátttöku almennings og tilkomu nýrra samfélagsmiðla. Einnig er lögð áhersla á aukin tækifæri varðandi skilvirkni, rafræna þjónustu og samvirkni og öryggi kerfa.
Ríkið rekur eitt stærsta tækniumhverfi landsins og gegnir upplýsingatækni fjölþættu hlutverki í rekstri ríkisins. Upplýsingatækni er einn helsti drifkrafturinn í endurmótun á opinberri starfsemi þar sem stefnt er að því að auka þjónustu, stuðla að nýsköpun og bæta samhæfingu til hagsbóta fyrir notendur. Með framþróun í upplýsingatækni og tilkomu svokallaðra tölvuskýja gefast tækifæri til frekari samreksturs og bættrar nýtingar þeirra fjármuna sem varið er í rekstur upplýsingatæknikerfa.
Verkefni á sviði upplýsingasamfélagsins heyra meðal annars undir eftirfarandi málefnasvið í gildandi fjármálaáætlun: Hagskýrslugerð, grunnskrár og upplýsingamál
Efling stafrænnar þjónustu er eitt af forgangsmálum stjórnvalda og stefnt að því að Ísland verði á meðal fremstu þjóða heims þegar kemur að stafrænni opinberri þjónustu. Hröð þróun hefur orðið í væntingum fólks til þjónustu á sama tíma og stór tækifæri hafa skapast til að bæta þjónustuupplifun notenda með aukinni stafrænni þjónustu. Síðustu misseri hefur stafræn þjónusta þróast hratt á Íslandi á grunni stefnu stjórnvalda og þeim sterku innviðum sem byggðir hafa verið upp hér á landi. Stefna um stafræna þjónustu verður gefin út á fyrri hluta árs 2021.
Verkefnastofa um stafrænt Ísland vinnur að framangi markmiða stjórnvalda í þessum málaflokki með það að markmiði að veita framúrskarandi þjónustu með öruggum hætti. Stafrænt Ísland vinnur að því að aðstoða opinberar stofnanir við að bæta stafræna þjónustu við almenning með því að gera þjónustuna skýrari, einfaldari og hraðvirkari. Þá er stafrænni þjónustu jafnframt ætlað að miða að styrkri samkeppnisstöðu Íslands, um störf í þekkingariðnaði og auka hagsæld með nýsköpun og skilvirkara samfélagi. Þá mun efling stafrænnar þjónustu skila aukinni hagræðingu í ríkisfjármálum og minnka áhrif opinberrar starfsemi á umhverfið.
Unnið er að ýmsum verkefnum á grunni aðgerðaáætlunar ríkisstjórnarinnar um eflingu stafrænnar þjónustu, sem samþykkt var í maí 2019, og yfirlýstum markmiðum um að stafræn samskipti verði megin samskiptaleið hins opinbera við almenning. Þá hefur Ísland gengist undir sameiginlega yfirlýsingu Norðurlandanna, Digital North, og vinnur í nánu samstarfi við hin Norðurlöndin og Eystrasaltsríkin að markmiðum um vistvæna og sjálfbæra þróun, auk hagnýtingar á gögnum og gervigreind.
Ábyrgð þeirra verkefna sem unnið er að liggur hjá fjármála- og efnahagsráðuneytinu, málaflokki 5.3 og 6.1 í fjármálaáætlun. Framkvæmd stefnu stjórnvalda og aðgerða er hjá fjármála- og efnahagsráðuneytinu sem er í samræmi við forsetaúrskurð um skiptingu stjórnarmálefna þar sem fram kemur að málefni upplýsingasamfélagsins falli undir ráðuneytið. ásamt Verkefnastofu um stafrænt Ísland í náinni samvinnu við stofnanir ríkisins, önnur ráðuneyti, sveitarfélög, almenning og fyrirtæki.
Forsætisráðuneytið, Fjármála- og efnahagsráðuneytið
Ábendingin verður notuð til að bæta gæði þjónustu og upplýsinga á vef Stjórnarráðsins. Hikaðu ekki við að hafa samband ef þig vantar aðstoð.
Vefurinn notar vefkökur til að bæta upplifun notenda og greina umferð um vefinn. Lesa meira
