Skýrsla rannsóknarnefnda umferðarslysa.
DÓMS- OG KIRKJUMÁLARÁÐUNEYTIÐ
Fréttatilkynning, 27.12.1999
Rannsóknarnefnd umferðarslysa hefur skilað dómsmálaráðherra ársskýrslu fyrir árið 1998, sem ráðherra kynnti á ríkisstjórnarfundi í morgun. Nefndin er skipuð samkvæmt ákvæði í umferðarlögum og starfar samkvæmt sérstakri reglugerð sem sett var í nóvember 1998. Nefndin er skipuð þremur fulltrúum, lögfræðingi sem formanni, lækni með sérþekkingu í slysa- og bráðalæknisfræði og verkfræðingi á sviði vegagerðar og sérfræðingi í umferðarmálum. Símon Sigvaldason, skrifstofustjóri Hæstaréttar Íslands, er formaður nefndarinnar.Markmið rannsóknarnefndarinnar er að auka þekkingu og skilning á orsökum umferðarslysa. Nefndinni er ætlað að rannsaka tiltekna flokka umferðarslysa og leggja fram tillögur til úrbóta. Nefndin tók formlega til starfa í ársbyrjun 1999. Þessi fyrsta skýrsla tekur til banaslysa á árinu 1998 og byggir fyrst og fremst á gögnum sem til voru fyrir það ár. Í niðurlagi skýrslunnar koma fram athugasemdir og ábendingar nefndarinnar vegna slysa á árinu 1998 sem nefndin vill koma á framfæri við viðkomandi yfirvöld.Dómsmálaráðherra hyggst senda ársskýrslu rannsóknarnefndarinnar til þeirra aðila sem athugasemdir og ábendingar varða einkum, þ.e. ríkislögreglustjóra, ríkissaksóknara, Umferðarráðs, landlæknis og Vegagerðarinnar, til athugunar og umsagnar. Jafnframt fyrirhugar dómsmálaráðherra að boða fulltrúa þessara stofnana til fundar upp úr áramótum og ræða frekari viðbrögð við skýrslunni og þeim tillögum sem þar koma fram. Í samráði við rannsóknarnefndina er síðan stefnt að því að halda ráðstefnu sem fyrst um þetta málefni, þar sem fjallað verði nánar um þessi alvarlegu mál.Undanfarin ár, ef undan eru skilin árin 1989 og 1995 virðist tala þeirra sem bíða bana í bifreiðum hafa lækkað stöðugt. Árið 1998 sker sig nokkuð úr og er það áhyggjuefni. Árið 1998 urðu 27 banaslys, 81% þeirra áttu sér stað í dreifbýli og um 19% í þéttbýli.
Ónóg notkun bílbelta og akstur undir áhrifum áfengis eru helstu orsakaþættir banaslysa í umferðinni 1998. Að áliti nefndarinnar eru þetta yfirgnæfandi áhrifavaldar, og af því tilefni bendir nefndir á að efla þurfi fræðslu og grípa verði til annarra aðgerða til að sporna gegn þessum vanda. Nefndin fjallar einnig um þá hættu sem stafar af hraðaakstri og leggur m.a. til að sektarheimildir vegna hraðaaksturs utan þéttbýlis verði endurskoðaðar.
Nefndin lætur í ljósi áhyggjur vegna þess hve ungir ökumenn áttu oft hlut að máli í banaslysum í umferðinni 1998. Leggur nefndin til aukið eftirlit og meiri áherslu í ökunáminu á akstur við erfiðar aðstæður, s.s. í lausamöl. Fleiri þættir eru teknir til skoðunar, s.s. skýrslugerð og rannsóknir, tækniskoðun bifreiða, blóðrannsóknir o.fl.