Burnham International á Íslandi h.f.
Iðnaðar- og viðskiptaráðuneyti
Nr. 23/2001
Að undanförnu hafa komið í ljós erfiðleikar í rekstri Burnham International á Íslandi hf., m.a. vegna verðfalls á verðbréfaeign félagsins. Að mati Fjármálaeftirlitsins og viðskiptaráðuneytisins er eiginfjárhlutfall félagsins undir lágmarkskröfum skv. 1. mgr. 42. gr. laga nr. 13/1996 um verðbréfaviðskipti.
Stjórn félagsins hefur á undanförnum vikum leitað leiða til að koma eigin fé félagsins í lögmælt horf og hefur Fjármálaeftirlitið veitt félaginu svigrúm í því sambandi í samræmi við 47. gr. laga nr. 13/1996 um verðbréfaviðskipti. Tilraunir félagsins hafa ekki borið árangur.
Með bréfi Fjármálaeftirlitsins til viðskiptaráðuneytisins, dags. í gær, lagði Fjármálaeftirlitið til að starfsleyfi Burnham International á Íslandi hf. yrði afturkallað. Í kjölfar skoðunar ráðuneytisins á málinu taldi ráðuneytið skylt að afturkalla starfsleyfið, sbr. 2. tölul. 1. mgr. 60. gr. laga um verðbréfaviðskipti nr. 13/1996. Forsvarsmenn fyrirtækisins lýstu sig sammála ákvörðun ráðuneytisins.
Í framhaldi af afturkölluninni mun viðskiptaráðuneytið leggja fram beiðni til Héraðsdóms Reykjavíkur um slit á félaginu í samræmi við 2. mgr. 62. gr. laga um verðbréfaviðskipti nr. 13/1996.
Í samræmi við framangreint hefur skrifstofum Burnham International á Íslandi hf. verið lokað. Mun skipaður skiptastjóri taka við rekstri félagsins og standa vörð um hagsmuni þeirra sem réttindi eiga á hendur félaginu, þ.m.t. séreign fjárvörsluþega.
Reykjavík, 27. nóvember 2001.