Leyfilegur heildarafli á fiskveiðiárinu 2002/2003
Fréttatilkynning
Leyfilegur heildarafli á fiskveiðiárinu 2002/2003
Ráðuneytið hefur í dag gefið út reglugerð um leyfilegan heildarafla á fiskveiðiárinu 2002/2003. Fyrir fiskveiðiárið er leyfilegur heildarafli sem hér segir:
- Tegund Lestir
Þorskur 179.000
Ýsa 55.000
Ufsi 37.000
Steinbítur 16.000
Karfi 60.000
Grálúða 23.000
Sandkoli 4.000
Skrápflúra 5.000
Skarkoli 5.000
Þykkvalúra 1.600
Langlúra 1.500
Keila 3.500
Langa 3.000
Skötuselur 1.500
Síld 105.000
Úthafsrækja 23.000
Innfjarðarækja 1.400
Hörpudiskur 4.150
Humar 1.600
Ákvörðunin um leyfilegan heildarafla felur í sér liðlega 2,4% aukningu aflamagns í þorskígildum talið frá yfirstandandi fiskveiðiári og er þá miðað við upphafsúthlutun í rækju bæði árin. Á síðasta ári var upphafsúthlutun rækju 17 þúsund tonn. Sé gert ráð fyrir að heildarafli rækju verði sá sami á komandi fiskveiðiári og á yfirstandandi ári lætur nærri, miðað við áætlað útflutningsverðmæti í dag, að útflutningsverðmæti þeirra tegunda sem ákvörðunin nær til verði óbreytt á milli fiskveiðiáranna 2001/2002 og 2002/2003.
Upphafsúthlutun á heildarafla úthafsrækju nemur 2/3 af leyfilegum heildarafla yfirstandandi fiskveiðiárs. Endanleg ákvörðun verður tekin að fengnum nýjum tillögum Hafrannsóknastofnunarinnar. Þá munu endanlegar ákvarðanir um heildarafla á innfjarðarækju einnig liggja fyrir í haust að loknum frekari rannsóknum á einstökum svæðum.
Heildaraflamarki í humri verður ekki skipt eftir svæðum að þessu sinni eins og Hafrannsóknastofnunin leggur til. Hins vegar mun sjávarútvegsráðherra skipa starfshóp sem mun hafa það hlutverk að fara ítarlegar yfir það mál svo og ýmis önnur mál er varða humarveiðarnar s.s. veiðarfæri, veiðitíma, meðafla og brottkas.
Sé litið til tillagna Hafrannsókastofnunarinnar þá verða veittar veiðiheimildir umfram tillögur í ufsa, skarkola og steinbít. Því verður heimilt að veiða 37.000 tonn af ufsa í stað 35.000 tonna, 5.000 tonn af skarkola í stað 4.000 tonna. Þá verður heildaraflamark í steinbít það sama og á yfirstandandi fiskveiðiári eða 16.000 tonn í stað 15.000 tonna skv. tillögum Hafrannsóknastofnunarinnar.
Verið er að fara betur yfir gögn er varða djúpkarfastofninn annars vegar og gullkarfastofninn hins vegar með það í huga að skipta úthlutuninni milli þeirra í stað óskiptrar úthlutunar eins og venja hefur verið.
Sjávarútvegsráðuneytið 5. júní 2002