Alþjóðasáttmáli um verndun menningarerfða samþykktur
Aðalráðstefnu UNESCO lauk í París 17. október. Samþykktur var alþjóðasáttmáli um verndun menningarerfða eftir nokkurra ára undirbúning. Sáttmálinn nær til varðveislu og verndun á þeim menningararfi þjóðanna sem varðveist hefur í munnlegri geymd - erfist frá kynslóð til kynslóðar og sem felst í ýmsum siðum og venjum. Aðildarríkin skuldbinda sig eftir efnum og aðstæðum til að skrásetja menningarerfðirnar og stuðla að því á annan hátt að þær glatist ekki. Komið verður á fót heimslista sem endurspegla skal fjölbreytnina.
Að þessu sinni samþykkti aðalráðstefna UNESCO óvenjumargar alþjóðlegar yfirlýsingar og ályktanir:
- alþjóðayfirlýsingu um erfðafræðilegar upplýsingar manna
- alþjóðayfirlýsingu um varðveislu stafræns menningararfs
- alþjóðaályktun um fjöltyngi og aðgang að netheimum
Þá var ákveðið að vinna að alþjóðasáttmála um menningarlega fjölbreytni, alþjóðasáttmála um lyfjaeftirlit og alþjóðayfirlýsingu um siðfræði í lífvísindum. Verða drög lögð fram á 33. aðalráðstefnu UNESCO sem haldin verður haustið 2005.
Nánari upplýsingar um aðalráðstefnuna má finna á heimasíðu UNESCO, www.unesco.org.
Aðildarríki UNESCO eru 190 eftir að Bandaríkin gengu núna aftur inn í samtökin eftir nærri 20 ára fjarveru og Austur Timor varð aðildarríki.