Ríkið kaupir St. Franciskusspítalann í Stykkishólmi
Fjármálaráðuneytið, fréttatilkynning nr. 39/2006
Árni Mathiesen, fjármálaráðherra, og systir Belén Aldanondo, fulltrúi St. Franciskusreglunnar undirrituðu í dag samkomulag um kaup ríkisins á eignarhluta reglunnar í St. Franciskusspítalanum í Stykkishólmi.
Tekið við lyklunum
Greiddar verða 140 milljónir fyrir hlut reglunnar og ríkið tekur auk þess að sér að standa undir lífeyrisréttindum starfsmanna sem þeir hafa áunnið sér. Siv Friðleifsdóttir, heilbrigðis- og tryggingamálaráðherra tók við spítalanum til reksturs frá og með áramótum við sama tækifæri.
Breytingar verða ekki á rekstri spítalans eða þjónustunni sem þar hefur verið veitt undanfarið. Þjónustusamningur sem í gildi var um rekstur og þjónustu spítalans milli heilbrigðis- og tryggingamálaráðuneytisins og stofnunarinnar fellur úr gildi við kaupin.
Á spítalanum eru 40 sjúkrarúm, 17 fyrir almenna sjúklinga, eitt bráðarými, 9 hjúkrunarrými og 13 rúm fyrir háls- og baksjúklinga. Á fyrstu hæð hússins er rekin heilsugæslustöð í tengslum við rekstur spítalans. Húsnæði heilsugæslustöðvarinnar er ekki í eigu St. Franciskusreglunnar.
Við undirritun frá vinstri: systir Czeslawa Oles príorinna St. Franciskusreglunnar í Stykkishólmi, Sif Friðleifsdóttir heilbrigðis- og tryggingamálaráðherra, systir Belén Aldanondo fulltrúi St. Franciskusreglunnar, Árni M. Mathiesen fjármálaráðherra og Sturla Böðvarsson samgönguráðherra
St. Franciskusreglan lét upphaflega reisa sjúkrahúsið í Stykkishólmi árið 1934 og var það tekið formlega í notkun 17. september 1936. Fyrir rúmum aldarfjórðungi réðust St. Franciskusreglan, ríkissjóður og hrepparnir sem þá ráku heilsugæslustöðina í að stækka sjúkrahúsið. Með sölu St. Franciskusspítalans lýkur formlegum afskiptum reglunnar af heilbrigðisþjónustu á Íslandi. Þar með er punkturinn settur aftan við 70 ára farsæla heilbrigðisþjónustu systrareglunnar sem kennir sig við heilagan Frans frá Assisí.
Nánari upplýsingar veitir Hafsteinn S. Hafsteinsson, lögfræðingur í fjármálaráðuneytinu í síma 545 9200.
Reykjavík 19. desember 2006