Aukinn hlutur kvenna í nefndum og ráðum fjármála- og efnahagsráðuneytis
Breyting hefur orðið til batnaðar hvað varðar hlut kvenna í nefndum og ráðum sem skipaðar eru af fjármála- og efnahagsráðherra.
Á árinu 2003 voru konur 30% þeirra sem sátu í nefndum á vegum ráðherra en á árinu 2012 var hlutfall kvenna komið í 42%.
Þetta sést á meðfylgjandi talnagögnum yfir nefndir og ráð á vegum ráðuneytisins.
Heildartölur frá 2001-2012
Ár | Konur | Karlar |
---|---|---|
2001 | 23% | 77% |
2003 | 30% | 70% |
2004 | 23% | 77% |
2005 | 24% | 76% |
2006 | 25% | 75% |
2007 | 28% | 72% |
2008 | 33% | 67% |
2009 | 35% | 65% |
2010 | 35% | 65% |
2011 | 39% | 61% |
2012 | 42% | 58% |
Í þeim tilvikum þar sem farið er fram á að yfirmenn stofnana séu tilnefndir í ráð og nefndir getur kynjahallinn orðið nokkur enda einungis um fjórðungur þeirra konur.
Upplýsingar verði birtar árlega
Í þingsályktun um áætlun í jafnréttismálum til fjögurra ára sem samþykkt var á Alþingi 19. maí 2011 er kveðið á um að ráðuneyti skuli birta á vef sínum upplýsingar um hlut kynjanna í nefndum og ráðum.
Í 15. gr. jafnréttislaga (nr. 10/2008) er kveðið á um að við skipun í nefndir, ráð og stjórnir á vegum ríkis og sveitarfélaga skuli þess gætt að hlutfall kynjanna sé sem jafnast og ekki minna en 40% þegar um fleiri en þrjá fulltrúa er að ræða. Þá er tekið fram að tilnefna skuli bæði karl og konu og er það gert til að skipunaraðili geti tryggt sem jafnast kynjahlutfall. Tilnefningaraðila er reyndar heimilt að víkja frá þessu lagaákvæði þegar hlutlægar ástæður leiða til þess að ekki er unnt að skipa bæði karl og konu.
Nefndir, ráð og stjórnir fjármálaráðuneytis
Samtals fjöldi fulltrúa
Ár | Konur | Karlar | Heild | Konur % | Karlar % |
---|---|---|---|---|---|
2010 | 88 | 165 | 253 | 35% | 65% |
2011 | 91 | 141 | 232 | 39% | 61% |
2012 | 110 | 151 | 261 | 42% | 58% |
Samtals fjöldi í nýjum nefndum
Ár | Konur | Karlar | Heild | Konur % | Karlar % |
---|---|---|---|---|---|
2010 | 18 | 41 | 59 | 31% | 69% |
2011 | 10 | 22 | 32 | 31% | 69% |
2012 | 35 | 47 | 82 | 43% | 57% |