Velferðarráðuneytið

Fjölgun starfa, hærra atvinnustig og aðgerðir gegn atvinnuleysi

Fánar Norðurlanda. Ljósmynd: Johannes Jansson/norden.org
Fánar Norðurlanda. Ljósmynd: Johannes Jansson/norden.org

Áhugaverðar upplýsingar um samstarf Norðurlandaþjóðanna, meðal annars á sviði vinnumála, koma fram í skýrslu um störf Norrænu ráðherranefndarinnar 2013 sem Eygló Harðardóttir, félags- og húsnæðismálaráðherra og samstarfsráðherra Norðurlanda kynnti á Alþingi í liðinni viku.

Sem fyrr felst samstarfið einkum í miðlun reynslu og upplýsinga um aðgerðir landanna og niðurstöður sem snerta sameiginleg úrlausnarefni. Megináhersla samstarfs á vinnumarkaðssviði er fjölgun starfa, aukið atvinnustig og að draga úr atvinnuleysi.

Áherslur í vinnuvernd snúa einkum að því að efla gott vinnuumhverfi, þróa vinnuvernd og vinnueftirlit, koma í veg fyrir óásættanleg starfskjör, félagsleg undirboð og mismunun á vinnumarkaði.

Forgangsmál norrænu ráðherranefndarinnar á öllum sviðum vinnumála er að afnema og fyrirbyggja stjórnsýsluhindranir á norrænum vinnumarkaði til að liðka fyrir hreyfanleika á milli svæða og gera vinnumarkaðinn meira aðlaðandi og sveigjanlegri. Samstarf við aðila vinnumarkaðarins er mikilvægur þáttur í samstarfinu.

Staða ungs fólks

Svíar sem fóru með formennsku í Norrænu ráðherranefndinni árið 2013 settu ungt fólk og aðgerðir til að draga úr atvinnuleysi ungs fólks á oddinn. Um 700 manns hvaðanæva af Norðurlöndunum sátu fund um atvinnumál ungs fólks þar sem kynnt var úrval verkefna sem þjóðirnar hafa unnið að í þessu skyni. Forsætisráðherrar og vinnumálaráðherrar landanna tóku þátt í fundinum. Alls voru kynnt 25 verkefni, þarf af þrjú íslensk.

Verkefni um atvinnuleysi ungs fólks á Norðurlöndum hófst haustið 2011 þar sem markmiðið var meðal annars að greina samspil skóla og vinnumarkaðar þegar ungt fólk lýkur námi og fer út á vinnumarkaðinn. Stöðurskýrslu um verkefnið var skilað á liðnu ári en lokaniðurstöður eru væntanlegar seinni hluta þessa árs.

Mikill ávinningur af norrænu samstarfi

Eygló Harðardóttir, félags- og húsnæðismálaráðherra, og samstarfsráðherra Norðurlanda árið 2014 segir skýrsluna um störf ráðherranefndarinnar fyrir liðið ár afar áhugaverða. Hún sýni vel hvað þjóðirnar eigi margt sameiginlegt, hvað áherslur þeirra séu líkar í mörgum efnum og gagnkvæmur hagur af samstarfi þeirra þar af leiðandi mikill: „Við erum sterkari saman, við getum lært hver af annarri og við getum unnið saman að mikilvægum málefnum. Atvinnumálin hafa verið ofarlega á baugi af skiljanlegum ástæðum síðustu ár. Ég tel áfram mikilvægt að sinna vel því samstarfi og eins legg ég mikið upp úr aðgerðum gegn stjórnsýsluhindrunum.“



Efnisorð

Var efnið hjálplegt?Nei
Takk fyrir

Ábendingin verður notuð til að bæta gæði þjónustu og upplýsinga á vef Stjórnarráðsins. Hikaðu ekki við að hafa samband ef þig vantar aðstoð.

Af hverju ekki?

Hafa samband

Ábending / fyrirspurn