Sjö norrænir ráðherrar funda í Keflavík 12. nóvember
Norræna ráðherranefndin um atvinnu-, orku- og byggðamál (MR-NER) fundar í Hljómahöllinni í Keflavík miðvikudaginn 12. nóvember.
Í tengslum við fundinn verður haldin tveggja daga ráðstefna þar sem fjallað verður um nýsköpun í lífhagkerfinu og byggðamál.
Ráðherrafundurinn hefst á umræðu um orkumál og stýrir Ragnheiður Elín Árnadóttir þeim hluta fundarins. Meðal þess sem verður til umræðu er norræni raforkumarkaðurnn, orkuskipti í samgöngum og á skipum og ný stefna Evrópusambandsins í orku- og loftslagsmálum.
Að loknum hádegisverði tekur við annar hluti ráðherrafundarins og fjallar hann um atvinnumál. Málefni nýsköpunar og frumkvöðlastarfsemi verða veigamikil í umræðunni sem og einföldun regluverks, ferðaþjónusta og þróun norræns samstarfs til að auka útflutning.
Síðasti hluti fundarins snýst um byggðamál og hefst hann kl. 15:30 með þátttöku norrænu ráðherranna í pallborðsumræðum á ráðstefnunni um nýsköpun í lífhagkerfinu. Að þeim loknum heldur fundurinn áfram undir stjórn Sigurða Inga Jóhannssonar ráðherra byggðamála.
Á ráðstefnunni sem haldinn er í Hljómahöllinni á miðvikudag og fimmtudag er kastljósinu beint að hlut norræna lífhagkerfisins í nýsköpun og dreifbýli.
Dagskrá ráðstefnunnar má lesa hér.
Norrænu ráðherrarnir sem sækja ráðherrafundinn eru:
- Ísland: Ragnheiður Elín Árnadóttir, iðnaðar- og viðskiptaráðherra og Sigurður Ingi Jóhannsson sjávarútvegs- og landbúnaðarráðherra.
- Danmörk: Rasmus Helveg Petersen orkumálaráðherra
- Noregur: Tord Lien olíu- og orkumálaráðherra og Jan Tore Sanner byggðamálaráðherra.
- Svíþjóð: Ibrahim Baylan orkumálaráðherra og Sven-Erik Bucht byggðamálaráðherra.