Samráð hjá ESB vegna kynjajafnréttis í samgöngum
Framkvæmdastjórn Evrópusambandsins hefur hafið opið samráð um jafnrétti kynja í samgöngum. Samráðinu á að ljúka í lok október 2016.
Samráðinu er beint að þremur hópum: Í fyrsta lagi til aðildarríkjanna, í öðru lagi til fagfélaga á sviði samgangna innan Evrópusambandsins og í þriðja lagi til samtaka þeirra sem starfa í samgöngum innan Evrópusambandsins.
Aðeins um 22% þeirra sem starfa í samgöngum eru konur en þær eru engu að síður um 46% af mannaflanum. Þá er einnig töluvert ójafnvægi innan greinanna og konur hverfandi í sumum stöðum.
Markmiðið með samráðinu er að semja stefnu um hvernig gera megi störf í samgöngum meira aðlaðandi fyrir konur. Hluti ástæðunnar er sá að meðalaldur þeirra sem starfa í samgöngum innan ESB hækkar og er þegar erfitt að manna sumar stöður í geiranum. Ný tækni hefur fjölgað tækifærum fyrir konur í geiranum.