Velferðarráðuneytið

Samningur við Vestfirðinga um móttöku flóttafólks

Gísli Halldór og Ásmundur Einar - myndVelferðarráðuneytið

Ásmundur Einar Daðason, félags- og jafnréttismálaráðherra og bæjarstjóri Ísafjarðarbæjar, Gísli Halldór Halldórsson, undirrituðu í dag samning um móttöku fimm flóttafjölskyldna samtals 23 einstaklinga. Móttaka fólksins er samstarfsverkefni Ísafjarðarbæjar, Súðavíkur og Bolungarvíkur.

Þetta er í annað sinn sem Ísafjarðarbær tekur á móti hópi flóttafólks, því kaupstaðurinn var fyrst sveitarfélaga til að taka á móti flóttafólki í samstarfi við félagsmálaráðuneytið og Flóttamannastofnun Sameinuðu þjóðanna árið 1996.

Samningurinn sem undirritaður var í dag lýtur að móttöku, aðstoð og stuðningi við fjölskyldurnar á næstu tveimur árum. Í hópnum eru tíu fullorðnir einstaklingar, ellefu börn og tvö ungmenni eldri en 18 ára. Þetta er annar samningurinn sem gerður er á þessu ári um móttöku flóttafólks frá Írak og Sýrlandi sem kemur til Íslands í samræmi við óskir Flóttamannastofnunar Sameinuðu þjóðanna, samtals 42 einstaklingar. Hluti hópsins kemur til landsins í dag en hinir sem eftir eru koma í næstu viku. Auk þessa fólks eru væntanlegir til landsins síðar í þessum mánuði tíu einstaklingar frá Úganda sem staðsettir eru í Kenýa.

Ásmundur Einar, félags- og jafnréttismálaráðherra, sagðist við undirritun samningsins í dag þakklátur sveitarfélögunum þremur fyrir velvilja þeirra í garð flóttafólksins sem væntanlegt er og einbeittan vilja til að taka sem best á móti því: „Ég held að í hugum margra sé fjölmenningarlegt samfélag eitt af einkennum norðanverðra Vestfjarða og á Ísafirði hefur Fjölmenningarsetrið verið starfrækt með góðum árangri um langt árabil. Allt skiptir þetta máli og eins vitum við að jákvæð viðhorf hafa tilhneigingu til að rætast.“

Sveitarfélögin hafa undirbúið móttöku fólksins í nánu samstarfi við velferðarráðuneytið og Rauða krossinn á Íslandi. Samningurinn um móttöku þess byggist á viðmiðunarreglum flóttamannanefndar þar sem staða flóttafólks og réttindi þeirra eru skilgreind, fjallað um um inntak aðstoðar við það fyrst eftir komuna til landsins og um kostnaðarskiptingu vegna þess milli ríkis og viðkomandi sveitarfélaga. Í grófum dráttum snúa verkefnin að því að tryggja fólki húsnæði, félagslega ráðgjöf, menntun og fræðslu, heilbrigðisþjónustu, aðstoð við atvinnuleit og fjárhagsaðstoð til framfærslu. Rauði krossinn kemur að móttöku fólksins þar sem hann útvegar fólkinu nauðsynlegt innbú á heimili þess og hefur umsjón með stuðningsfjölskyldum sem ætlað er að liðsinna flóttafólkinu við aðlögun að íslensku samfélagi.

Efnisorð

Hafa samband

Ábending / fyrirspurn