Forsætisráðuneytið

Katrín Jakobsdóttir, forsætisráðherra, heimsótti Hagstofu Íslands og embætti ríkislögmanns

Katrín Jakobsdóttir, forsætisráðherra, í heimsókn hjá Hagstofu Íslands - mynd
Katrín Jakobsdóttir, forsætisráðherra, heimsótti Hagstofu Íslands og embætti ríkislögmanns í gær, fimmtudaginn 15. mars.

Í heimsókn Katrínar til Hagstofu Íslands kynnti hún sér fjölbreytta starfsemi stofnunarinnar og áhersluverkefni um þessar mundir. Það var Ólafur Hjálmarsson, Hagstofustjóri sem tók á móti ráðherra og fylgdarliði ásamt yfirstjórn Hagstofunnar og fékk ráðherra kynningu á öllum sviðum stofnunarinnar sem eru efnahagssvið, félagsmálasvið, fyrirtækjasvið, rekstrarsvið og svið stjórnsýslu og samstarfs. Á Hagstofunni starfa um 100 fastráðnir starfsmenn en auk þess eru um 60 lausráðnir spyrlar sem vinna við úrtakskannanir stofnunarinnar.

Þá heimsótti forsætisráðherra embætti ríkislögmanns, þar sem Einar Karl Hallvarðsson, ríkislögmaður, tók á móti ráðherra og fylgdarliði ásamt starfsmönnum embættis síns. Viðfangsefni embættisins voru kynnt og fjallaði ríkislögmaður m.a. um fjölgun mála hjá embættinu á undanförnum árum og fjölbreytt viðfangsefni. Starfsmenn embættisins eru tíu.

Viðfangsefni embættisins eru einkum rekstur dómsmála fyrir ríkið og stofnanir þess í einkamálum, uppgjör bótakrafna, þ.á m. tryggingabætur ríkisstarfsmanna og álitsgerðir fyrir ráðuneyti.

Hafa samband

Ábending / fyrirspurn