Samgöngu- og sveitarstjórnarráðuneytið

Tvíhliða fundur samgönguráðherra Finnlands og Íslands

Anne Berner, samgönguráðherra Finnlands, og Sigurður Ingi Jóhannsson, samgöngu- og sveitarstjórnarráðherra, á fundinum í morgun. - mynd

Sigurður Ingi Jóhannsson, samgöngu- og sveitarstjórnarráðherra, sem nú tekur þátt í opinberri heimsókn forseta Íslands til Finnlands, hitti í morgun finnska samgönguráðherrann Anne Berner. Á fundinum ræddum þau stöðu samgöngu- og sveitarstjórnarmála í ríkjunum tveimur.

Sigurður Ingi og Anne Berner eru einnig samstarfsráðherrar Norðurlanda og ræddu þau norrænt samstarf og fyrirhugaða formennsku Íslands í Norrænu ráðherranefndinni sem hefst um næstu áramót. Þau voru sammála um að verulegur kraftur væri nú í Norðurlandasamstarfinu og að Ísland tæki við formennskunni á spennandi tímum. Margs konar stefnumótun og samstarf á norrænum vettvangi miðar að því að tryggja stöðu dreifðari byggða með samstarfi um fjarskipti og með því að skiptast á reynslu og góðum hugmyndum um atvinnusköpun í smærri bæjum.

Ráðherrarnir ræddu ýmis mál á fundi sínum, t.d. innleiðingu á 5G, ljósleiðaravæðingu og gervihnattaleiðsögukerfi á norðurslóðum. Í því sambandi var talað um Evrópska kerfið sem nær ekki yfir norðurslóðir og voru ráðherrarnir sammála um mikilvægi þess að gera kerfið nákvæmara og nauðsyn þess að lönd á norðurslóðum hefðu samvinnu við að bæta það. Þá ræddu þau siglingaöryggi og leiðir til að fjármagna samgöngur í framtíðinni.

Um hádegisbil tók Sigurður Ingi þátt í hringborðsumræðum á vegum forseta Íslands og forseta Finnlands, sem fram fóru í finnskum ísbrjóti. Í ávarpi sínu lagði ráðherra m.a. áherslu á mikilvægi þess að finna jafnvægið milli náttúruverndar og sjálfbærrar nýtingar náttúruauðlinda, það væri hægt og ætti að vera markmiðið.

Var efnið hjálplegt?Nei
Takk fyrir

Ábendingin verður notuð til að bæta gæði þjónustu og upplýsinga á vef Stjórnarráðsins. Hikaðu ekki við að hafa samband ef þig vantar aðstoð.

Af hverju ekki?

Hafa samband

Ábending / fyrirspurn