Forsætisráðuneytið

Ríkisstjórnin styrkir Kvennafrí 2018 um fimm milljónir kr.

Þann 24. október 1975 lögðu þúsundir kvenna um land allt niður vinnu til að sýna fram á mikilvægi vinnuframlags kvenna undir yfirskriftinni kvennafrí og síðan hafa konur fjórum sinnum til viðbótar gengið út af vinnustað sínum til að mótmæla misrétti og misjöfnum kjörum kynjanna á íslenskum vinnumarkaði.

Fulltrúar 34 samtaka kvenna og fimm heildarsamtaka launafólks munu sameiginlega efna til viðburðarins Kvennafrí 2018 þann 24. október nk., undir formerkjum #metoo / #églíka til að styðja við þær konur sem hafa stigið fram og sagt sögur sínar. Með því vilja konur láta heyra í sér á nýjan leik og kalla eftir aðgerðum stjórnvalda, atvinnurekenda, stéttarfélaga, félagasamtaka og stofnana og breytingum innan samfélagsins í heild.

Undirbúningsnefnd sem skipuð hefur verið um viðburðinn leitaði til ríkisstjórnarinnar með beiðni um styrk vegna undirbúnings og framkvæmd samstöðufunda og samþykkti ríkisstjórnin á fundi sínum í morgun að veita fimm milljónir kr. af ráðstöfunarfé sínu til verkefnisins.

Hafa samband

Ábending / fyrirspurn