Nýdoktorsstaða - Rannsóknamiðstöð um sjónskynjun
Nýdoktorsstaða: Taugafræðilegar mælingar á æðri sjónskynjun hjá lesblindu og ólesblindu fólki, Rannsóknamiðstöð um sjónskynjun, Háskóla Íslands, Reykjavík
Rannsóknamiðstöð um sjónskynjun (www.visionlab.is/islenska) auglýsir fulla stöðu nýdoktors til tveggja ára. Gert er ráð fyrir að nýdoktorinn vinni að rannsóknum á æðri sjónskynjun (high-level vision) hjá lesblindu og ólesblindu fólki þar sem sameinaðar verða mælingar á hegðun og heilarafritun (EEG). Forstöðumenn Rannsóknamiðstöðvar um sjónskynjun eru dr. Heiða María Sigurðardóttir, dr. Árni Gunnar Ásgeirsson og dr. Árni Kristjánsson.
Nýdoktorinn mun vinna náið með stjórnanda rannsóknarverkefnisins, dr. Heiðu Maríu Sigurðardóttur (http://visionlab.is/heida). Aðrir samstarfsaðilar eru dr. Yvonne Höller (Háskólinn á Akureyri), Paolo Gargiulo (Háskólinn í Reykjavík) og Freyja Birgisdóttir (Háskóli Íslands). Nýdoktorsstaðan er að fullu fjármögnuð með styrk frá Rannsóknasjóði (www.rannis.is).
Samkvæmt tilgátu okkar um skerta æðri sjónskynjun (high-level visual dysfunction hypothesis) eiga lestrarörðugleikar sums lesblinds fólks rætur sínar að rekja til almennari vandkvæða í sjónrænni úrvinnslu sem aftur kemur til vegna skertrar virkni í æðri sjónsvæðum heilans. Þessi heilasvæði gegna lykilhlutverki í sjónrænum orðakennslum og hlutakennslum. Í samræmi við tilgátuna gefa fyrri rannsóknir okkar (Sigurdardottir et al., 2015; 2017; 2018; 2019) til kynna að lesblindir eigi í vandræðum með verkefni sem ættu að reyna á æðri sjónsvæði í kviðlægum sjónstraumi (ventral visual stream).
Helstu verkefni og ábyrgð
Helsta rannsóknarverkefni nýdoktorsins er að kanna hvort tilgátan um almenna skerta virkni í æðri sjónsvæðum heilans hjá lesblindu fólki eigi við rök að styðjast. Ætlunin er að raunprófa tilgátuna með beinum hætti með hjálp heilarafritunar (EEG) og mælinga á hegðun. Niðurstöður rannsóknarinnar koma til með að nýtast til að móta kenningar um orða-, andlits- og hlutaskynjun sem og kenningar um orsakir lesblindu. Vonast er til að niðurstöðurnar geti orðið grunnur að mótun nýrra skimunar- og þjálfunaraðferða fyrir lesblint fólk.
Hæfnikröfur
Við leitum eftir umsækjendum með doktorsgráðu (Ph.D. eða sambærilegt) í viðeigandi fræðigrein (til dæmis, en ekki bundið við, í hugrænum taugavísindum, hugfræði eða tilraunasálfræði). Fyrri reynsla af heilarafritun (EEG), virkni í útgáfu á rannsóknargreinum, reynsla af forritun/skriptun (til dæmis MATLAB, Python, R), reynsla af rannsóknum á æðri sjónskynjun/lesblindu, og geta til að tjá sig fumlaust á ritaðri og talaðri ensku eru allt æskilegir kostir.
Frekari upplýsingar um starfið
Laun samkvæmt gildandi kjarasamningi sem fjármála- og efnahagsráðherra og Félag háskólakennara hafa gert.
Labbið:
Rannsóknamiðstöð um sjónskynjun (www.visionlab.is) býður upp á lifandi og fjölbreytt akademískt umhverfi. Núverandi og fyrrverandi meðlimir labbsins koma frá sjö mismunandi löndum úr öllum heimshornum. Nýdoktorinn mun koma inn í þetta samfélag framhaldsnema, nýdoktora og akademískra starfsmanna sem allir vinna að rannsóknum á skynjun og hugarstarfi. Labbið er vel fjármagnað með styrkjum og býður upp á góðan tækjakost til rannsókna.
Gert er ráð fyrir að viðkomandi hefji störf um 20. ágúst, eða eftir nánara samkomulagi
Umsækjendur skulu senda inn ferilskrá, bréf sem tilgreinir rannsóknarreynslu þeirra og markmið í starfi, lista yfir ritrýndar birtingar, auk nafna, síma og netfanga tveggja akademískra meðmælanda.
Öllum umsóknum verður svarað og umsækjendum tilkynnt um ráðstöfun starfsins þegar ákvörðun hefur verið tekin. Umsóknir geta gilt í sex mánuði frá lokum umsóknarfrests.
Við ráðningu í störf í Háskóla Íslands er tekið mið af jafnréttisáætlun skólans, sjá hér: http://www.hi.is/haskolinn/jafnrettisaaetlun#markmid2.
Vakin er athygli á málstefnu Háskóla Íslands, sjá hér: https://www.hi.is/haskolinn/malstefna_haskola_islands.
Tilvísanir:
Sigurdardottir, H. M., Hjartarson, K. H., Gudmundsson, G. L., & Kristjánsson, Á (2019). Own-race and other-race face recognition problems without visual expertise problems in dyslexic readers. Vision Research, 158, 146-156.
Sigurdardottir, H. M., Fridriksdottir, L.E., Gudjonsdottir, S., & Kristjánsson, Á. (2018). Specific problems in visual cognition of dyslexic readers: Face discrimination deficits predict dyslexia over and above discrimination of scrambled faces and novel objects. Cognition, 175, 157-168.
Sigurdardottir, H. M., Danielsdottir, H. B., Gudmundsdottir, M., Hjartarson, K. H., Thorarinsdottir, E. A., & Kristjánsson, Á. (2017). Problems with visual statistical learning in developmental dyslexia. Scientific Reports, 7(1), 606.
Sigurdardottir, H. M., Ivarsson, E., Kristinsdottir, K., and Kristjansson, A. (2015). Impaired recognition of faces and objects in dyslexia: Evidence for ventral stream dysfunction? Neuropsychology, 29(5) 739-750.
Starfshlutfall er 100%
Umsóknarfrestur er til og með 11.06.2019
Nánari upplýsingar veitir
Heiða María Sigurðardóttir - [email protected] - 525 5428
Háskóli Íslands
Sálfræðideild
v/Vatnsmýrarveg
101 Reykjavík
Smelltu hér til að sækja um starfið