Fyrirlestur Lilju í lávarðadeild breska þingsins
„Jafnrétti er grundvöllur réttláts samfélags. Jafnrétti milli kynjanna stuðlar að öðru jafnrétti og frelsi í okkar samfélagi. Ég fjallaði um þrjár meginástæður þess að staða kvenna á Íslandi er jafn góð og raun ber vitni en þær tel ég vera gott aðgengi að menntun, jafnt aðgengi barna að leikskólum og lenging fæðingarorlofsins fyrir báða foreldra. Síðan eigum við einnig margar mikilvægar kvenfyrirmyndir, eins og frú Vigdísi Finnbogadóttur,“ segir Lilja Alfreðsdóttir mennta- og menningarmálaráðherra.
Árangur Íslands í jafnréttismálum hefur vakið athygli. Ísland situr ellefta árið í röð í efsta sæti á kynjajafnréttislista Alþjóðaefnahagsráðsins (e. World Economic Forum) en þar er metin frammistaða 153 ríkja á sviðum stjórnmála, menntunar, atvinnu og heilbrigðis.
„Staða jafnréttismála á Íslandi er góð í alþjóðlegum samanburði og við höfum náð eftirtektarverðum árangri á mörgum sviðum. Það er samt að ýmsu að huga, til dæmis á vinnumarkaði þar sem ég tel samfélagslega mikilvægt að við látum af því að skilgreina ákveðnar tegundir starfa sem annað hvort karla- eða kvennastörf. Líkt og John Stuart Mill benti á í sínum skrifum verðum við öll að læra og reiða okkur á sjálfstæða hugsun – hún er farvegur framfara, og þar með velferðar fyrir samfélagið allt,“ segir ráðherra.