Listdansráð skipað til fimm ára
„Nýjum sviðslistalögum er ætlað að vökva og næra starf okkar frábæra sviðslistafólks. Ég er sannfærð um að nýtt listdansráð verður Íslenska dansflokknum mikill stuðningur og að flokkurinn festi sig enn frekar í sessi sem vagga listdansmenningar í landinu, framsækinn og nútímalegur. Við búum vel að eiga listamenn á borð við dansarana sem skipa Íslenska dansflokkinn og ég hlakka til að sjá starfið dafna áfram, “ segir Lilja Alfreðsdóttir, mennta- og menningarmálaráðherra.
Listdansráð hefur eftirlit með starfsemi Íslenska dansflokksins og veitir ráðherra reglulega umsögn um stefnu hans og áætlanir. Samkvæmt lögum er það hlutverk Íslenska dansflokksins að sýna dansverk, vera vettvangur fyrir framþróun og nýsköpun danslistar á Íslandi og glæða áhuga landsmanna á danslist. Verkefnaval skal vera fjölbreytt og tryggt skal að á dagskrá hvers starfsárs séu íslensk dansverk. Dansflokkurinn annast einnig fræðslu- og kynningarstarf og stendur að sýningarferðum.