Vinna hafin við rúm 80% verkefna í stjórnarsáttmála
Forsætisráðuneytið hefur tekið saman yfirlit yfir stöðu þeirra verkefna sem sett eru fram í stjórnarsáttmála Framsóknarflokks, Sjálfstæðisflokks og Vinstrihreyfingarinnar – græns framboðs. Samantektin leiðir í ljós að vinna við rúmlega 80% verkefna er hafin eða komin vel á veg en vinna við tæplega 20% verkefna ekki hafin.
Í samvinnu við önnur ráðuneyti hefur forsætisráðuneytið skipt verkefnum í stjórnarsáttmála niður á ábyrgðarsvið ráðherra og kallað eftir upplýsingum frá ráðuneytum um stöðu verkefna og áætlaða framvindu á kjörtímabilinu. Verkefni í stjórnarsáttmála eru 213 en nokkrum þeirra hefur verið skipt upp þannig að heildarfjöldi er nú 242.
Forsætisráðuneytið mun næst taka saman upplýsingar um stöðu verkefna í júní og þá verða birtar nánari upplýsingar um framvindu hvers verkefnis.