Nýr vefur opnar í viku upplýsinga- og miðlalæsis
Sérstök fræðsluvika tileinkuð upplýsinga- og miðlalæsi er haldin þessa vikuna, 13.-17. febrúar. Markmiðið er að gera vikuna að árlegum viðburði þar sem áhersla verður lögð á vitundarvakningu á mikilvægi upplýsinga- og miðlalæsis ásamt því að bjóða upp á nýtt fræðsluefni með mismunandi áherslum milli ára.
Tengslanet um upplýsinga- og miðlalæsi (TUMI) stendur að vikunni og í tilefni hennar var opnaður sérstakur vefur um miðlalæsi midlalaesi.is í gær.
Á vefnum má meðal annars finna:
- Fræðslumyndbönd og stuðningsefni fyrir kennara til þess að vinna verkefni og eiga samtal við nemendur um miðlalæsi.
- Hugtakalista með gagnlegum skýringum á ýmsum orðum úr netheimum eins og t.d. spjallmenni, upplýsingaóreiða, algóritmi og djúpvefur.
- Skráningu á málþing um miðlalæsi í Grósku 16. febrúar.
- Gagnlega hlekki á ítarefni.
- Upplýsingar um verkefnið og tengslanetið.
Opið fræðsluefni
Sex stutt fræðslumyndbönd voru gefin út í tilefni vikunnar og eru aðgengileg á nýja vefnum. Þau fjalla öll um mismunandi hliðar miðlalæsis og fylgja hverju myndbandi umræðupunktar og kennsluleiðbeiningar til þess að aðstoða kennara við að eiga samtal við nemendur um ábyrga síma- og netnotkun.
Myndböndin sex fjalla um:
- Samtal um samfélagsmiðla
- Samfélagsmiðla og aldursmerkingar
- Fréttir og falsfréttir
- Hatur og áreiti á netinu
- Áhorf á klám á netinu
- Líðan og samfélagsmiðla
Málþing um upplýsinga- og miðlalæsi
Opið málþing um upplýsinga- og miðlalæsi verður svo haldið í Grósku á fimmtudaginn 16. febrúar kl. 09:00-12:00.
Takmarkað sætaframboð er í boði í salnum og geta þeir sem vilja skráð sig á málþingið hér. Fyrir þá sem komast ekki verður málþingið einnig í boði í streymi.
Katrín Jakobsdóttir forsætisráðherra opnar málþingið og við tekur svo aðalfyrirlesari þess, Stephanie Comey, sérfræðingur á sviði miðlalæsis og aðstoðarforstjóri írsku fjölmiðlastofnunarinnar (BAI). Fyrirtæki á borð við Meta og Google eru með evrópskar höfuðstöðvar sínar í Írlandi og falla því undir eftirlit írsku fjölmiðlastofnunarinnar.