Mælti fyrir myndlistarstefnu á Alþingi

Lilja Alfreðsdóttir, menningar- og viðskiptaráðherra, hefur mælt fyrir þingsályktunartillögu um myndlistarstefnu til ársins 2030 á Alþingi. Tillagan felur í sér bæði stefnu og aðgerðaáætlun í myndlist sem miða að því að efla myndlistarmenningu á Íslandi.

„Ný myndlistarstefna er gríðarlega stórt skref í þá átt að stórbæta starfsumhverfi myndlistarmanna og -safna á Íslandi. Myndlistarlíf á Íslandi er í miklum blóma og hér er sjónum beint að tækifærum til enn frekari vaxtar,“ segir Lilja Alfreðsdóttir, menningar- og viðskiptaráðherra.

Stefnan byggir á vinnu verkefnahóps með fulltrúum frá Sambandi íslenskra myndlistarmanna, myndlistarráði, Listasafni Íslands, Kynningarmiðstöð íslenskrar myndlistar, listskreytingasjóði, i8 Gallerí og þáverandi mennta- og menningarmálaráðuneyti, en hópnum var falið að móta heildstæða stefnu um málefni myndlistar á Íslandi til ársins 2030.

Í myndlistarstefnunni eru fjögur meginmarkmið:

• Á Íslandi ríki kraftmikil myndlistarmenning.
• Stuðningskerfi myndlistar verði einfalt og skilvirkt.
• Íslensk myndlist verði sýnileg og vaxandi atvinnugrein.
• Íslensk myndlist skipi alþjóðlegan sess.

Þingsályktunartillögunni fylgir svo aðgerðaáætlun til ársins 2030 sem unnið verður í samræmi við til að tryggja framgang myndlistar í landinu. Sem dæmi um aðgerðir á áætluninni má nefna:

• Lögð verði áhersla á þjálfun í skapandi hugsun, eflingu listkennslu og myndlæsi innan skólakerfisins.
• Aðgengi almennings verði aukið að Listasafni Íslands.
• Stofnaður verði starfshópur sem móti framtíðarsýn fyrir uppbyggingu Listasafns Íslands sem höfuðsafns á heimsmælikvarða.
• Komið verði á fót upplýsingaveitu og tengslaneti sem auki samstarf um rannsóknir á sviði lista.
• Myndlistarsjóður verði efldur og fái tækifæri til að styðja við fjölbreytt verkefni á víðu sviði myndlistar.
• Ítarleg greining verði gerð á þeim möguleika að færa myndlist í 11% virðisaukaskattsþrep.