Slysavarnir styrktar í Skaftafelli og Öræfum
LandsbjörgMarkmiðið með viðaukanum er að efla viðbragðsgetu í Skaftafelli og Öræfum ef slys eða annað óhapp verður. Langt er í daglega viðbragðsþjónustu og mikil aukning ferðamanna á svæðinu kallar eftir auknu viðbragði.
„Gott neyðarviðbragð á fjölförnustu ferðamannastöðum landsins er gríðarlega mikilvægt. Ég hef lagt mikla áherslu á þetta sem ferðamálaráðherra. Það er einfaldlega nauðsynlegt að styrkja innviði á þessu svæði og auka enn frekar samvinnu á milli viðbragðsaðila á svæðinu; lögreglu, sjúkraflutninga og Vatnajökulsþjóðgarðs,“ segir Lilja Dögg Alfreðsdóttir menningar- og viðskiptaráðherra.
Ráðuneytið styrkir Slysavarnafélagið Landsbjörg um 2.500.000 króna framlag. Samningurinn gildir frá 1. júní 2023 til 1. september 2023.
Slysavarnafélagið Landsbjörg verður með mannaðar vaktir á svæðinu í fjórar til fimm vikur í sumar. Í því felst meðal annars að björgunarsveitarfólk er á vakt allan sólarhringinn til að bregðast við og björgunarsveitarbílar eru á svæðinu. Landsbjörg verður með aðstöðu í Skaftafelli þar sem vakt er yfir daginn til að aðstoða ferðamenn og aðra vegfarendur.
