Pælt í PISA – næstu fundir
Mennta- og barnamálaráðuneytið vekur athygli á opinni fundaröð um niðurstöður PISA-rannsóknarinnar 2022. Næsti fundur, Pælt í PISA – Greining á stöðu læsis, fer fram 23. janúar kl. 15:00–16:30 hjá Menntavísindasviði Háskóla Íslands í Stakkahlíð.
Á fundinum mun Guðmundur Bjarki Þorgrímsson, sérfræðingur við Menntamálastofnun, gefa yfirlit yfir niðurstöður PISA 2022 á stöðu læsis og Sigríður Ólafsdóttir, prófessor við Menntavísindasvið Háskóla Íslands, rýna dýpra í niðurstöðurnar. Umræður verða í kjölfarið.
Fundarstjóri og stjórnandi umræðna er Anna Kristín Sigurðardóttir, prófessor við Menntavísindasvið HÍ.
Hægt er að fylgjast með fundinum á netinu og verður hann tekinn upp.
Alls verða haldnir sjö fundir á vegum Menntavísindasviðs Háskóla Íslands, mennta- og barnamálaráðuneytisins, Menntamálastofnun, Kennarasambands Íslands, Sambands íslenskra sveitarfélaga og Heimilis og skóla. Markmið fundanna er að kafa dýpra í niðurstöður PISA.
Pælt í PISA – næstu fundir:
- Miðvikudaginn 28. febrúar 2024 - Farsæld, líðan og viðhorf nemenda
- Þriðjudaginn 5. mars 2024 - Greining á stöðu læsis á náttúruvísindi
- Þriðjudaginn 12. mars 2024 - Rýnt í svör skólastjórnenda
- Fimmtudagurinn 21. mars 2024 - Samstarf heimila og skóla
- Fimmtudaginn 4. apríl - Menntakerfið og ójöfnuður
Fyrsti fundurinn var haldinn á mánudag og fjallaði um greiningu á stöðu læsis á stærðfræði. Fundirnir eru opnir og eru öll velkomin.
Um PISA
Menntamálastofnun sá um framkvæmd PISA-rannsóknarinnar sem lögð var fyrir alla nemendur í 10. bekk vorið 2022. Samstarf hefur verið milli Menntavísindasviðs og Menntamálastofnunar um greiningu gagnanna og túlkun niðurstaðanna.
PISA-rannsóknin er lögð fyrir í 72 löndum um heim allan. Könnuð er frammistaða nemenda í stærðfræðilæsi, lesskilningi og náttúrulæsi. Könnunin er framkvæmd á þriggja ára fresti (frestaðist um eitt ár vegna heimsfaraldurs) og gefur vísbendingar um breytingar á frammistöðu nemenda yfir tíma ásamt því að meta stöðu þeirra við lok skyldunáms.
Uppfært 28.02.24 kl. 12:53