Tunguhreppur - Heimild hreppsnefndar til að skipa hreppsnefndarmenn eða maka þeirra í skólanefnd
Kári Ólason 24. apríl 1996 96040055
Árbakka, Tunguhreppi 1001
701 Egilsstaðir
Vísað er til erindis yðar til ráðuneytisins, dagsett 17. apríl 1996, varðandi skipan skólanefndar í Brúarási, Hlíðarhreppi. Í erindinu er spurst fyrir um hvort það standist lög að hreppsnefndir skipi hreppsnefndarmenn eða maka hreppsnefndarmanna í skólanefndir og hvort slíkt sé eðlilegt.
Um skipan skólanefndar grunnskóla eru m.a. ákvæði í 13. gr. laga um grunnskóla nr. 66/1995. Í 1. mgr. 13. gr. segir svo m.a.: “Skólanefnd skal kosin af hlutaðeigandi sveitarstjórn eða sveitarstjórnum í upphafi hvers kjörtímabils.” Um verkefni skólanefndar er síðan fjallað á nokkrum stöðum í lögunum og má nefna 12. gr. þeirra sem dæmi.
Í 1. mgr. 43. gr. sveitarstjórnarlaga nr. 8/1986 er svohljóðandi ákvæði: “Kjörnum fulltrúum í sveitarstjórn og varamönnum þeirra er skylt að taka kjöri í nefnd, ráð eða stjórn á vegum sveitarfélagsins.” Samkvæmt þessu er sveitarstjórnarmanni skylt að taka kjöri ef sveitarstjórn kýs hann í einhverja nefnd á sínum vegum. Gert er því beinlínis ráð fyrir að sveitarstjórnarmenn geti setið í nefndum á vegum sveitarstjórnar.
Með hliðsjón af ákvæðum grunnskólalaga nr. 66/1995 og sveitarstjórnarlaga nr. 8/1986 telur ráðuneytið að skólanefnd og hreppsnefnd séu ekki tvö stjórnsýslustig, heldur er skólanefnd starfsnefnd á vegum hreppsnefndar og er hún kjörin á grundvelli 1. mgr. 57. gr. sveitarstjórnarlaga og 13. gr. laga um grunnskóla.
Með vísan til þessa telur ráðuneytið að sveitarstjórn sé heimilt að skipa hreppsnefndarmenn í skólanefnd. Jafnframt er ekki að finna í lögum um grunnskóla og/eða sveitarstjórnarlögum ákvæði er útiloka maka hreppsnefndarmanns frá því að vera kjörinn í skólanefnd.
F. h. r.
Húnbogi Þorsteinsson (sign.)
Sesselja Árnadóttir (sign.)
Samrit: Katrín Ásgeirsdóttir, Hrólfsstöðum, Jökuldalshreppi, 701 Egilsstaðir.