Vestur-Landeyjahreppur - Skylda hreppsnefndarmanns til að svara spurningum oddvita
Vestur-Landeyjahreppur 14. maí 1998 98010001
Eggert Haukdal oddviti 1001
Félagsheimilinu Njálsbúð
861 Hvolsvöllur
Vísað er til erindis yðar til félagsmálaráðuneytisins, dagsett 22. apríl 1998, þar sem leitað er “aðstoðar ráðuneytisins til að fá svör frá Hirti Hjartarsyni.“
Í 1. mgr. 41. gr. sveitarstjórnarlaga nr. 8/1986 er sveitarstjórnarmönnum veittur mjög víðtækur réttur til að fá gögn og réttar upplýsingar um rekstur síns sveitarfélags og í lögunum er ekki að finna sérstaka heimild fyrir oddvita til að takmarka þann rétt.
Í sveitarstjórnarlögum er hins vegar ekki að finna nein ákvæði sem skylda einstaka sveitarstjórnarmenn til að upplýsa um skoðanir sínar í tilteknum málum eða upplýsa um ástæður fyrir skoðunum sínum.
Með vísan til þess er ljóst að ráðuneytið hefur engar heimildir til að knýja einstaka sveitarstjórnarmenn um slík svör. Hins vegar hefur ráðuneytið samkvæmt sveitarstjórnarlögum heimildir til að knýja á um að fylgt sé ákvæðum þeirra laga, m.a. um upplýsingaskyldu um fjármál sveitarfélagsins.
F. h. r.
Húnbogi Þorsteinsson (sign.)
Sesselja Árnadóttir (sign.)
Afrit: Hjörtur Hjartarson.