Vestur-Landeyjahreppur - Einn hreppsnefndarmanna undarritar ekki ársreikning

Vestur-Landeyjahreppur                                       18. maí 1998                                                       98050046

Eggert Haukdal oddviti                                                                                                                              1001

Félagsheimilinu Njálsbúð

861 Hvolsvöllur

             Vísað er til erindis yðar til félagsmálaráðuneytisins, dagsett 13. maí 1998, þar sem óskað er eftir áliti ráðuneytisins á því að einn hreppsnefndarmanna hefur ekki undirritað ársreikning Vestur-Landeyjahrepps fyrir árið 1997 þrátt fyrir afgreiðslu hreppsnefndar á ársreikningnum.

             Í VIII. kafla sveitarstjórnarlaga nr. 8/1986 er fjallað um fjármál sveitarfélaga. Í 1. mgr. 88. gr. laganna er kveðið á um að sveitarstjórn skuli hafa lokið fullnaðarafgreiðslu ársreikninga sveitarsjóðs og fyrirtækja hans eigi síðar en í júlímánuði. Með fullnaðarafgreiðslu er átt við tvær umræður í sveitarstjórn um ársreikninginn, sbr. b-lið 52. gr. laganna, og í framhaldi af því undirritun sveitarstjórnarmanna. Gert er því ráð fyrir undirritun allra sveitarstjórnarmanna að lokinni lögformlegri afgreiðslu í hreppsnefnd. Ef einhver sveitarstjórnarmanna hefur athugasemdir fram að færa við ársreikninginn er honum heimilt að undirrita ársreikninginn með fyrirvara og vísa til greinargerðar sinnar um málið eða bókunar í hreppsnefnd.

F. h. r.

Húnbogi Þorsteinsson (sign.)

Sesselja Árnadóttir (sign.)

Afrit:  Hjörtur Hjartarson.