Forstjóri Náttúrufræðistofnunar Íslands - Umsóknarfrestur framlengdur til 21. september
Forstjóri Náttúrufræðistofnunar Íslands
Umhverfis- og auðlindaráðuneytið auglýsir laust embætti forstjóra Náttúrufræðistofnunar Íslands.
Leitað er eftir leiðtoga með kraft og metnað til að vinna að markmiðum stofnunarinnar. Náttúrufræðistofnun Íslands stundar m.a. undirstöðurannsóknir í dýrafræði, grasafræði og jarðfræði landsins og annast skipulega heimildasöfnun um náttúru Íslands. Stofnunin hefur víðtækt vöktunar- og fræðsluhlutverk.
Umhverfis- og auðlindaráðherra skipar forstjóra Náttúrufræðistofnunar Íslands til fimm ára í senn. Forstjóri stýrir stofnuninni, mótar stefnu í störfum hennar og ber ábyrgð á rekstri hennar. Hjá stofnuninni starfa um 55 starfsmenn.
Helstu verkefni stofnunarinnar eru:
• Stunda vísindalegar rannsóknir á náttúru Íslands
• Varðveita náttúrugripi og vísindaleg heimildasöfn
• Skrá kerfisbundið einstaka þætti íslenskrar náttúru
• Vöktun lykilþátta íslenskrar náttúru
• Öflun og miðlun upplýsinga og þekkingar sem varða íslenska náttúru
Menntunar- og hæfniskröfur:
• Háskólamenntun með meistaragráðu sem nýtist í starfi
• Þekking á verksviði stofnunarinnar
• Reynsla af stjórnun- og rekstri
• Reynsla af vinnu við stefnumótun og áætlanagerð
• Leiðtogahæfileikar og hæfni til að leiða fólk til samvinnu og árangurs
• Reynsla af opinberri stjórnsýslu er kostur
• Gott vald á íslensku og góð kunnátta í ensku
Umsókn skal fylgja ítarleg starfsferilskrá og stutt kynningarbréf um ástæðu umsóknar auk upplýsinga um árangur sem viðkomandi hefur náð í starfi og telur að nýtist í embættið. Þriggja manna valnefnd skipuð af umhverfis- og auðlindaráðherra metur hæfni og hæfi umsækjenda og skilar greinargerð til ráðherra.
Umsóknarfrestur er framlengdur til og með 21. september nk.
Umsóknum skal skila rafrænt á netfangið [email protected].
Fjármála- og efnahagsráðherra ákveður föst laun fyrir dagvinnu í samræmi við grunnmat embættis forstjóra Náttúrufræðistofnunar Íslands og önnur laun er embættinu fylgja.
Ráðuneytið hvetur einstaklinga af öllum kynjum til að sækja um starfið.
Upplýsingar um embættið veitir Sigríður Auður Arnardóttir, ráðuneytisstjóri í umhverfis- og auðlindaráðuneytinu ([email protected]).