Á fundi ríkisráðs á Bessastöðum í dag endurstaðfesti forseti Íslands, Guðni Th. Jóhannesson, tillögu forsætisráðherra, Sigurðar Inga Jóhannssonar, um að veita ráðuneyti hans lausn frá störfum.

Á öðrum fundi ríkisráðs sem haldinn var sama dag féllst forseti Íslands á tillögu Bjarna Benediktssonar alþingismanns um skipun fyrsta ráðuneytis hans og gaf út úrskurð um skiptingu starfa ráðherra.

Störfum er þannig skipt með ráðherrum:

• Bjarni Benediktsson, forsætisráðherra.
• Þorgerður Katrín Gunnarsdóttir, sjávarútvegs- og landbúnaðarráðherra.
• Þórdís Kolbrún Reykfjörð Gylfadóttir, ferðamála-, iðnaðar- og nýsköpunarráðherra.
• Benedikt Jóhannesson, fjármála- og efnahagsráðherra.
• Sigríður Á. Andersen, dómsmálaráðherra.
• Jón Gunnarsson, samgöngu- og sveitarstjórnarráðherra.
• Kristján Þór Júlíusson, mennta- og menningarmálaráðherra.
• Björt Ólafsdóttir, umhverfis- og auðlindaráðherra.
• Guðlaugur Þór Þórðarson, utanríkisráðherra.
• Óttarr Proppé, heilbrigðisráðherra. 
• Þorsteinn Víglundsson, félags- og jafnréttismálaráðherra.

Sjá nánar í forsetaúrskurði um skiptingu starfa ráðherra (á vef Stjórnartíðinda).

Einnig hafa verið gerðar breytingar á forsetaúrskurði um skiptingu stjórnarmálefna á milli ráðuneyta.

Samkvæmt úrskurðinum munu málefni Seðlabanka Íslands færast til forsætisráðuneytisins frá fjármála- og efnahagsráðuneytinu, en verkefni hagskýrslugerðar og upplýsinga um landshagi, þ.m.t. málefni Hagstofu Íslands, færast frá fyrrnefnda ráðuneytinu til þess síðarnefnda. Að auki flytjast málefni Vísinda- og tækniráðs og málefni þjóðmenningar frá forsætisráðuneytinu til mennta- og menningarmálaráðuneytis. Þá færast málefni Þingvallaþjóðgarðs, að undanskildum Þingvallabænum, frá forsætisráðuneytinu til umhverfis- og auðlindaráðuneytis og neytendamál færast til atvinnuvega- og nýsköpunarráðuneytis frá innanríkisráðuneytinu. Loks færast verkefni byggðamála til innanríkisráðuneytis en þau heyrðu áður undir atvinnuvega- og nýsköpunarráðuneyti. 

Sjá nánar um skiptingu stjórnarmálefna á milli ráðuneyta í forsetaúrskurði  (á vef Stjórnartíðinda).

Sjá einnig stefnuyfirlýsingu ríkisstjórnarinnar.