Ráðningar stjórnenda hjá ríkinu
Í samræmi við aðgerðir í stjórnendastefnu ríkisins hefur verð útbúið samræmt verklag við ráðningar stjórnenda hjá ríkinu. Um er að ræða verklag sem nýtist ráðuneytum og öðrum sem hafa umsjón með ráðningum stjórnenda. Verklagið er í reglulegri endurskoðun og uppfærslu í takt við reynslu og árangur.
Markmið
Markmið vandaðs ráðningaferlis er að ráða alltaf hæfasta einstaklinginn til starfa. Jafnframt að ríkið og stofnanir þess hafi á að skipa öflugum og hæfum stjórnendum til að takast á við þær áskoranir sem starfið felur sér.
Tímasetningar
Tímasetningar eru mikilvægar til að tryggja eðlilega framvindu í ráðningaferlinu bæði fyrir þann embættismann sem fyrir er og ekki síður fyrir þá sem hyggjast sækja um lausar stjórnendastöður.
Gagnsæi
Ákveðin umgjörð er sett í kringum allar ráðningar hjá ríkinu til að tryggja gagnsæi og vönduð vinnubrögð. Á sama tíma þarf að huga að persónuvernd umsækjenda svo það verði áfram eftirsóknarvert að sækja um stjórnendastörf hjá ríkinu.
1. Stjórnendastarf losnar og ákvörðun um auglýsingu er tekin
Mikilvægt er að skoða hvort enn sé þörf á sömu hæfni og áður eða hvort kröfur starfsins til stjórnenda hafi breyst. Fara þarf vel í gegnum stöðuna sem losnar og skilgreina nauðsynlegar hæfniskröfur til framtíðar. Móta þarf nýtt erindisbréf á grundvelli umræddrar greiningar og hæfniskrafna sem skilgreindar eru í stjórnendastefnu ríkisins.
2. Auglýsing starfs útbúin
Settar eru fram í auglýsingu þær hæfniskröfur sem ofangreind starfsgreining leiddi í ljós og eru í samræmi við áherslur ráðherra. Stjórnendastefna og kjörmynd þar sem skilgreindar eru hæfniskröfur til stjórnenda ríkisins skal ávallt lögð til grundvallar.
3. Auglýsing samþykkt
Ráðherra og viðkomandi aðilar innan ráðuneytis samþykkja inntak auglýsingar eftir því sem við á.
4. Birting auglýsingar
- Birting á starfatorgi er lögbundin Sjá leiðbeiningar um birtingu á starfatorgi.
- Birting í Lögbirtingablaði er einnig lögbundin fyrir öll embætti. Sjá leiðbeiningar um birtingu í lögbirtingablaði.
5. Valferli
Allt ferli er varðar val á hæfasta umsækjandanum þarf að vera samræmt og samkvæmt vönduðum stjórnsýsluháttum, óháð því hvort valnefnd sé skipuð eða valferlið sé alfarið innan ráðuneytis. Skylt er að skipa hæfnisnefndir ef skipa á ráðuneytisstjóra eða skrifstofustjóra en metið er hverju sinni í tilfelli forstöðumanna hvort skipa eigi valnefnd. Í gildi eru reglur um ráðgefandi nefndir er meta hæfni umsækjenda um störf forstöðumanna.
6. Ráðningaáætlun
Mikilvægt er að hæfnisnefnd setji sér ráðningaáætlun um ráðningaferlið. Til grundvallar slíkri áætlun eru þeir þættir sem leiða má af auglýsingu um starfið, þeim reglum sem um það gilda og öðrum málefnalegum sjónarmiðum. Þegar ráðningaáætlun er tilbúin er hún borin undir ráðherra og ráðuneytisstjóra.
7. Matsviðmið
Matsviðmið eru búin til út frá kröfum í auglýsingu ásamt vægi viðmiða og skilgreininga og borin undir ráðherra og ráðuneytisstjóra.
8. Hæfi
Þegar umsóknarfresti lýkur eru nöfn umsækjenda tekin saman og kynnt ráðherra sem metur hæfi sitt. Hæfi þarf einnig að meta fyrir aðra sem koma að valferlinu. Sjá nánar í II. kafla stjórnsýslulaga nr. 37/1993.
9. Birting á nöfnum umsækjenda, sé þess óskað
Standi til að birta nöfn umsækjenda að eigin frumkvæði skal tilkynna viðkomandi aðilum um það. Upplýsa þarf umsækjendur um nafnabirtingu áður en þeir sækja um, samanber skref 2.
10. Val á umsækjendum í viðtal
Umsækjendur eru metnir út frá matsviðmiðum (skref 7). Valið er úr þeim hópi sem best uppfylla skilyrðin sem fram komu í auglýsingu og viðkomandi umsækjendum boðið í viðtal að undangengnu samþykki ráðherra eða fulltrúa hans.
11. Viðtal
Viðtalið skal byggt upp á þann hátt að það staðfesti þann árangur og þá reynslu sem fram kemur í umsóknargögnum og farið er fram á í auglýsingu. Viðtöl byggja á stöðluðum spurningum til að tryggja jafnræði allra umsækjenda. Einnig er mikilvægt að nýta viðtalið til að kanna persónulega færni, sem ekki er metin með reynslu.
12. Annað mat
Eftir fyrsta viðtal eru þeir aðilar sem best koma út valdir til að koma í annað viðtal eða mat eftir atvikum. Slíkt mat gæti t.d. byggt á kynningu, verkefni eða öðru sambærilegu mati.
13. Skýrsla til ráðherra
Skrifa skal skýrslu til ráðherra þar sem lagt er til hverjir koma helst til greina í starfið. Í skýrslunni skal koma fram ítarlegur rökstuðningur fyrir mati nefndar og hvaða gögn liggja til grundvallar á matinu.
14. Val ráðherra
Ráðherra tekur viðtöl við þá aðila sem mælt er með, kjósi hann það.
15. Ráðning
Ráðherra eða ráðuneytisstjóri hefur samband við þann sem talinn er hæfastur umsækjenda og býður viðkomandi starfið.
16. Samskipti
Tilkynna skal öðrum umsækjendum um skipun þegar valinn umsækjandi hefur þegið starfið.
17. Frágangur gagna í Málaskrá
Vista skal gögn í Málaskrá ráðuneytisins.
Starfsumhverfi stjórnenda ríkisins
Ábendingin verður notuð til að bæta gæði þjónustu og upplýsinga á vef Stjórnarráðsins. Hikaðu ekki við að hafa samband ef þig vantar aðstoð.