Framvinda verkefnisins

Öll ráðuneyti verða komin með fagfulltrúa til starfa hjá sendiskrifstofu Íslands í Brussel á þessu ári. Samkvæmt endurskoðuðum reglum um þinglega meðferð EES-mála frá 2018 leggur utanríkis- og þróunarsamvinnuráðherra nú skýrslu um EES-mál fyrir Alþingi árlega og upplýsingaöflun til Alþingis hefur þegar verið efld í samræmi við nýja verkferla vegna hagsmunagæslu. Þá kynnir ráðherra fyrir utanríkismálanefnd, eins og kostur er, þær gerðir sem fyrirhugað er að taka upp á fundum sameiginlegu EES-nefndarinnar hverju sinni.

Aukin áhersla hefur verið lögð á að greina tillögur á mótunarstigi sem varðað geta íslenska hagsmuni og líkur eru á að verði teknar upp í EES-samninginn. Markvisst endurbótastarf innan stjórnsýslunnar undanfarin ár hefur auðveldað viðfangsefnið. Í byrjun árs 2017 var nýr EES-gagnagrunnur tekinn í notkun innan íslensku stjórnsýslunnar sem auðveldar sérfræðingum til muna að fylgjast með nýjum málum sem eru í undirbúningi innan ESB. Í tilefni af 25 ára afmæli EES-samningsins var ný EES.is upplýsingaveita sett í loftið árið 2019 þar sem safnað hefur verið saman öllum helstu upplýsingum um EES-samninginn og framkvæmd hans m.a. hvað varðar hagsmunagæslu. Á upplýsingaveitunni var hluti EES-gagnagrunnsins einnig gerður opinber sem er mikilvægur liður í að auka upplýsingagjöf til Alþingis, hagsmunaaðila og almennings, m.a. um mál sem eru í bígerð. Allar upplýsingar um tillögur á mótunarstigi og stöðu EES-gerða sem unnið er að eru aðgengilegar í gagnagrunninum.

Nýr forgangslisti ríkisstjórnarinnar í EES-málum var samþykktur haustið 2020 og eru alls 22 mál á listanum. Það var í þriðja sinn sem slíkur listi var lagður fram og tekur hann til áranna 2020-2021. Fyrir útgáfu listans var haft samráð við hagsmunaaðila, bæði á vinnslustigi og í gegnum opið samráð í samráðsgátt stjórnvalda. Listinn var einnig kynntur fyrir utanríkismálanefnd Alþingis ásamt niðurstöðum samráðs. Forgangslistinn auðveldar samhæfingu þeirra sem sinna hagsmunagæslu til að fylgjast með málum á vettvangi EES-samstarfsins til að forgangsraða málum sem varða grundvallarhagsmuni Íslands. Aukin þverfagleg nálgun framkvæmdastjórnar Evrópusambandsins kallar ekki síst á aukna samhæfingu milli ráðuneyta og er forgangslistinn mikilvægt tæki til þess að tryggja að engin mál sem snerta hagsmuni Íslands falli á milli skips og bryggju.

Ábyrgð

Utanríkisráðuneytið

Kafli

Alþjóðamál