Tók skóflustungu að nýju pósthúsi
Fyrsta skóflustunga að nýju pósthúsi Íslandspósts var tekin á Akranesi síðastliðinn föstudag. Er það fjórða nýja pósthúsið sem fyrirtækið ræðst í að byggja á síðustu misserum.
Sturla Böðvarsson samgönguráðherra tók skóflustunguna og Ingimundur Sigurpálsson, forstjóri Íslandspósts, flutti tölu við athöfnina. Sagði hann byrjað á nýjum pósthúsbyggingum á Reyðarfirði, Húsavík og Stykkishólmi og framundan væri að hefja byggingu sex nýrra pósthúsa.
Í kjölfar stefnumótunar Íslandspósts um framtíðaruppbyggingu á þjónustunni um landið var ákveðið að ráðast í byggingu 10 pósthúsa og endurbætur á nokkrum öðrum stöðum. Fjárfesting við uppbygginguna er alls um 950 milljónir króna en seldar verða eignir fyrir um 250 milljónir króna.