Lýsing á aðgerð
C.5. Forvarnir í félagsmiðstöðvum.
Fræðslu um kynferðislegt og kynbundið ofbeldi og áreitni verði beint til unglinga í gegnum félagsmiðstöðvar. Stígamótum verði falið að halda áfram fræðslu til starfsfólks félagsmiðstöðva sem fram hefur farið í tengslum við átakið Sjúk ást. Þannig verði fest í sessi það fyrirkomulag að unglingar sem sækja árlegt ball Samfés þurfi fyrst að fá fræðslu í félagsmiðstöð sinni. Skoðað verði hvernig megi styðja með frekari hætti forvarnastarf í félagsmiðstöðvum, einkum það sem beinist að því að þjálfa starfsfólk félagsmiðstöðva í að fjalla um kynferðislegt og kynbundið ofbeldi og áreitni, svo sem með Ofbeldisforvarnaskólanum.
- Mælikvarði: Allir unglingar sem sækja árlegt ball Samfés hljóti fræðslu Sjúkrar ástar í félagsmiðstöð sinni.
- Kostnaðaráætlun: 2 millj. kr. á ársgrundvelli árin 2021–2025.
- Ábyrgðaraðili: Stígamót.
- Dæmi um samstarfsaðila: Samfés, Ofbeldisforvarnaskólinn, verkefni Reykjavíkurborgar Opinskátt um ofbeldi, Háskóli Íslands (tómstunda- og félagsmálafræði), Samtökin '78, Fjölmenningarsetur, Tabú og forvarnafulltrúi Sambands íslenskra sveitarfélaga.
Staða verkefnis
Árleg Sjúkást herferð fór í loftið um miðjan mars. Áherslan í ár er á rauð og græn flögg í hegðun og samskiptum og var umræðuspilið Sjúk flögg útbúið og dreift í allar félagsmiðstöðvar landsins. Markmiðið með herferðinni sem og spilinu er að fá ungt fólk til að velta fyrir sér eigin hegðun og hegðun annarra og um leið skerpa á heilbrigðum viðmiðum þegar kemur að samskiptum, mörkum og samböndum. Eins og áður voru gögn úr Sjúktspjall notuð í hugmyndavinnu herferðarinnar sem og reynsla og þekking ráðgjafa á Stígamótum. Til þess að skýra betur hvers konar hegðun telst rautt flagg og hvers konar telst grænt flagg voru útbúin fjölmörg myndbönd þar sem fólk er að nýta spilið Sjúk flögg og ræða fullyrðingar sem eru að finna í því. Myndböndunum hefur verið dreift á samfélagsmiðla Sjúkást sem og sett í auglýsingar (birtingar) til að ná sem víðast, en enn fleiri myndböndum verður svo dreift á næstu mánuðum. Myndbönd herferðarinnar á Tiktok hafa fengið yfir 200.000 áhorf, yfir 150.000 á instagram og yfir 20.000 áhorf í gegnum auglýsingar á Youtube. Auglýsingar á herferðinni voru einnig birtar í strætóskýlum og er áætlað áhorf á þær 680.204.Veggspjöld í formi flagga (rauð og græn) voru prentuð og send á allar félagsmiðstöðvar, framhaldsskóla og ungmennahús landsins ásamt spilinu Sjúk flögg. Þá var sambandsrófið þýtt yfir á pólsku og dreift. Félagsmiðstöðvum stóð einnig til boða að óska sérstaklega eftir prentuðu efni frá fyrra ári, t.d. sambandsrófið á íslensku eða ensku, kynlíf vs. kynferðisofbeldi og verkefnið Það sem ég hefði viljað vita fyrr. Fræðsla á glæruformi var útbúin, en í ár var hún á íslensku og ensku fyrir bæði félagsmiðstöðvar og framhaldsskóla, og var einnig útbúin íslensk útgáfa á auðskildu máli. Handrit með fræðslunni fylgdi pakkanum ásamt upptöku af kynningu á fræðslunni. Fræðslupakkinn var sendur á allar félagsmiðstöðvar og framhaldsskóla, en hann er aðgengilegur öllum í gegnum vefsíðu Sjúkást. Eins og áður hefur Sjúkást fræðsla verið skilyrði fyrir þau sem ætla sér á Samfestinginn, en margar félagsmiðstöðvar nýta tækifærið og flytja fræðsluna fyrir heilu árganganna í samstarfi við grunnskóla.
Verkefnið telst vera komið vel á veg.
Staða verkefnis
Komið vel á veg
