Lýsing á aðgerð

Gerð verði rannsókn á stöðu og réttindum hinsegin fólks á Íslandi. Meðal annars verði horft til löggjafar og stefnumótunar stjórnvalda, stöðu hinsegin barna og ungmenna í skólum, stöðu á vinnumarkaði, stöðu eldri borgara innan hinsegin samfélagsins, aðgengis að félagslegri þjónustu og þjónustu heilbrigðiskerfisins og almennt til félagslegrar stöðu og réttinda. Leitað verði eftir samstarfi við Rannsóknastofnun í jafnréttisfræðum (RIKK) við framkvæmd rannsóknarinnar.

Markmið aðgerðarinnar verði að kortleggja stöðu og réttindi hinsegin fólks á Íslandi til að útfæra frekari aðgerðir til hagsbóta fyrir hinsegin fólk í samfélaginu.

    Tímaáætlun: 2022–2024.

    Ábyrgð: Forsætisráðuneyti (nú dómsmálaráðuneyti).

    Kostnaðaráætlun: 5 millj. kr.

Heimsmarkmið Sameinuðu þjóðanna: Markmið 10.2, 10.3, 10.4, 16.6, 16.7, 16.10, 16.b og 17.17.

Staða verkefnis: Kortlagningu lauk í lok árs 2024. Kynning á yfirlitsskýrslu fór fram í Hannesarholti undir yfirskriftinni Hinsegin veruleiki þann 20. mars 2025. Á kynningunni greindi höfundur skýrslunnar, Þorsteinn Vilhjálmsson, doktor í gagnrýnum fræðum, frá helstu niðurstöðum hennar og tillögum til úrbóta. Þar kom fram að auka þyrfti fræðslu um hinseginleika til að draga úr fordómum, efla félagsstarf til að bæta andlega líðan hinsegin fólks, vinna gegn hatursglæpum og -orðræðu, stuðla að aukinni meðvitund um samtvinnun í stað aðgreiningar, gera upp tíma alnæmisfaraldursins og auka rannsóknir. Sjá frétt á https://www.stjornarradid.is/efst-a-baugi/frettir/stok-frett/2025/03/21/Islendingar-saekja-fram-a-svidi-hinsegin-mannrettinda/

Ábyrgð

Dómsmálaráðuneytið

Lokið